Бүгүн Айсен Николаев Кэскилээнэ Туприналыын төлөпүөнүнэн кэпсэттэ, муммут дьону көрдүүргэ туох үлэ бара турарын билиһиннэрдэ.
Айсен Сергеевич кыһалҕалаах кыыска, туох миэрэлэр ылыныллыбыттарын, былааҥҥа баалларын, маны таһынан, өйүүрүн, сүппүт дьон этэҥҥэ көстүөхтэрэ диэн эрэллээҕин эттэ.
Санатан суруйдахха, Анаабыр улууһугар алтынньы 18 күнүгэр дьон сүппүтэ — икки эр киһи уонна биир кыыс диэн иһитиннэрии Саха сирин биир гына тарҕаммыта. Сааскылаахтан икки эр киһи уонна биир кыыс Үрүҥ Хайаҕа бураанынан айаннаабыттар. Нэһилиэнньэлээх пууннар икки ардылара — 160 км. Кэлин биллибитинэн, бу дьон иһигэр былырыын «Туман» диэн ырыанан биллибит игирэ аҥаара Кэрэчээнэ Туприна баар эбит. Кэрэчээнэ алтынньы 17 күнүгэр Дьокуускайтан Сааскылаахха кэлбит. Кинини көрсө диэн аҕата Олег Туприн доҕорун Федор Спиридоновы кытта Үрүҥ Хайаттан бураанынан кэлбиттэр.
Кэскилээнэ ийэтин кытта Анаабырдыырыгар үтүө санаалаах дьон харчы хомуйдулар. Кини дьиэ кэргэнин өйөөбүт уонна харчынан көмөлөспүт дьоҥҥо махталын тиэрдэр.
Айтана АММОСОВА, edersaas.ru