Дьокуускайга KFC диэн аан дойдутааҕы эрэстэрээннэр ситимнэрин филиала ахсынньыга аһыллыахтаах этэ. Ол эрээри, кэккэ биричиинэнэн, ол тохсунньу көстө.
edersaas.ru
KFC куорат килбэйэр киинигэр саҥа тутуллубут «СахаЭкспоЦентр» дьиэтин бэһис этээһигэр аһыллыахтаах. Бу дьиэ хаһаайына Владимир Федоров иһитиннэрбитинэн, уһаабыт биричиинэтэ кинилэртэн тутулуга суох. Саҥа дьыл өрөбүллэрин кэнниттэн аһыллара былааннанар. Эрэстэрээн кэнсиэпсийэтэ, ис бараанын дизайна оҥоһуллан турар. Былырыыҥҥыттан ыла кэпсэтии барбыт, дьиҥэ, ахсынньыга аһыллыахтаах эбит.
Ыспыраапка
KFC (1991 сылга диэри — Kentucky Fried Chicken — «Кентукки ыһаарыламмыт кууруссата” диэн ааттааҕа) сүрүннээн куурусса этиттэн фаст-фуд ас арааһын оҥорон атыылыыр. Хампаанньа ыстаап-кыбартыырата АХШ Кентукки штатын Луисвилл куоратыгар баар. McDonald’s кэнниттэн, аан дойдуга иккис улахан түргэнник аһатар кафелар ситимнэрэ буолар. 2015 сылга 125 дойдуга 15 тыһыынча эрэстэрээни арыйбыта, 750 тыһыынча үлэһиттээх. Миллиардынан дуоллар дохуоттаах тэрилтэ.
KFC кафены аан бастаан предприниматель Харланд Сандерс арыйбыта, урут Улуу депрессия саҕана ыһаарыламмыт кууруссалары атыылааһынынан дьарыгырбыта. Кини мэтириэтэ билигин хампаанньа логотибыгар ойууламмыт.
Массыынанан сүүрдэн кэлээт, анал түннүктэн тута ас атыылаһар өҥөнү киэҥник тарҕаппыттара. Ону тэҥэ аһылыгын сыаната чэпчэки буолан, фаст-фуд аһы сөбүлээччилэр Дьокуускайга арылларын олус кэтэһэллэр.
Ангелина Васильева, “Саха сирэ” хаһыат, edersaas.ru