Сураҕа суох сүппүт дьону көрдөөһүн — полиция үлэтин сүрүн хайысхаларыттан биирдэстэрэ. Улахан да киһи, оҕо да сүтүүтэ сырыы аайы долгуйууну, ол-бу бөрүкүтэ суох сабаҕалааһыны үөскэтэр, суһал быһаарыыны эрэйэр.
Вера МАКАРОВА, «Саха сирэ», edersaas.ru
Маныаха полиция бэлиэтииринэн, «сүтээччилэр», сүрүннээн, 40-гар диэри саастаах дьон. Үксүгэр, олоххо оттомо суохтук сыһыаннаһалларыттан, көрү-нары, күүлэйи батыһалларыттан итинник тахсар. Сол курдук дьиэлэриттэн тахсан бардылар да, ууга тааһы бырахпыттыы сүтэн хаалаллар. Саатар дьонноругар эрийэн, ханна баалларын, сылдьалларын биллэрбэттэр эбит. Соторутааҕыта оннук «сүппүт» дьону полиция оперативниктара буллулар.
Ол курдук, Хаҥалас улууһугар төрөппүт көрүүтэ-харайыыта суох хаалбыт оҕолорго көмөлөһөр киинтэн 13 саастаах уол кимиэхэ да эппэккэ-сэрэппэккэ, тахсан баран хаалбыт. Ити киин иитээччилэриттэн биирдэстэрин кытта кыыһырсан баран. Дьолго, бу оҕону сарсыҥҥы күнүгэр булбуттар — Дьокуускай куоракка ийэтигэр киирэн олорор эбит.
Киин куоракка олорор 40-чалаах дьахтар үс күнү быһа дьонугар тугу да биллэрбэккэ, мэлийэн хаалбыт. Кинини дьүөгэтиттэн булбуттар — арыгылаабыттар.
Эмиэ Дьокуускай куорат ханна да үлэлээбэт 42 саастаах олохтооҕо хас да суукканы быһа дьиэтигэр кэлбэтэх. Аймахтара киһилэрин сүтэрэн, ыксаан, полицияҕа тыллаабыттар. Эмиэ атастарын кытта арыгылыы сылдьыбыт.
Кулун тутар ый бүтүүтүгэр 30 саастаах дьахтар Амматтан Дьокуускайга барбыт уонна ол айыыта онон. Төрөппүттэрэ эрэйдээхтэр утуйар уулара көтөн, араас куһаҕаны бары сабаҕалаан, полицияҕа кэлбиттэр. Оскуолаҕа үлэлиир кыыстара сааскы каникул кэмигэр куоракка сынньана диэн барбыт. Оперативниктар бу дьахтары түргэнник булбуттар — нэдиэлэни быһа доҕотторун-дьүөгэлэрин кытта итирдэр утаҕынан үлүһүйэ сылдьыбыт.
Бу дьоммут санаарҕаан иэдэйиэхтэрэ эҥин диэн долоҕойдоругар оҕустаран көрбөт «халлаан дьонуттан» киһи эрэ бэркиһиир.
Полиция сэрэтэр: өскөтүн чугас киһиҥ сүттэҕинэ, олорор сириҥ Ис дьыалаҕа отделыгар кэлэн, бэйэҥ докумуоҥҥун көрдөрөҕүн уонна сүппүт киһини туоһулуур докумуоннары аҕалаҕын.
Маныаха бу киһи тас көрүҥүн сиһилии, үчүгэйдик ойуулаан биэриэхтээххин, хаартыскатын илдьэ кэлиэхтээххин. Тугунан дьарыктанарын, майгытын-сигилитин, сыһыаҥҥытын, кимнээҕи кытта алтыһарын, ханна тиийиэн сөбүн — быһата, кини туһунан тугу билэргитин барытын ыраас мууска ууран биэрэҕит.
Быраабы араҥаччылыыр уорганнарга төһөнөн түргэнник биллэрэҕит да, сүппүт киһини көрдөөһүн соччонон суһаллык саҕаланар.
Вера МАКАРОВА, «Саха сирэ» хаһыат, edersaas.ru
Хаартыска: интернеттэн ылылынна.