Инбэлиит уопсастыбаҕа тэҥҥэ сылдьыахтаах

Бөлөххө киир:

Өрөспүүбүлүкэҕэ 60 тыһыынча кэриҥэ инбэлиит олорор (ол иһигэр 6 тыһыынчаттан тахса оҕо). Сыл аайы 5 тыһыынча кэриҥэ киһи инбэлииккэ тахсар.Кырдьаҕастары, инбэлииттэри социальнай хааччыйыы стационардара сэбиэскэй кэмтэн саҕалаан бааллар.

2000 сыллаахха 1887 миэстэлээх 23 тэрилтэ баара. 2005-2008 сс. 30-ка тиийэ сылдьыбыт (2100-2200 миэстэ). Билигин – 21 стационар (16 кырдьаҕастар, инбэлииттэр интэринээт-дьиэлэрэ, 5 психоневрологическай интэринээт) баар. Ол эрээри, маннык дьиэлэргэ наадыйыы улаатан иһэр эбит. Билигин 2343 киһи олорор. Инбэлиит оҕолорго 180 миэстэлээх биир стационар баар. Манна билигин 167 оҕо олорор.

Доруобуйа айгыраан, инбэлиит аатын сүгүү киһиэхэ сыанан аҕаабата чахчы. Сорохтор киһиттэн итэҕэс сананан, дьиэҕэ олорон, бүгэн хаалаллар. Ол эрээри, киһи инбэлиититтэн тутулуга суох уопсастыбаҕа сылдьыахтаах, дьоҕурун сайыннарар, үөрэнэр, кыаҕа баарынан үлэлиир бырааптаах.
Инбэлииттэргэ эбии төлөбүрдэр, чэпчэтиилэр көрүллэллэр. “Российскай Федерацияҕа инбэлииттэр социальнай көмүскэллэрин туһунан” 181 №-дээх федеральнай сокуон чэрчитинэн, араас социальнай көмө оҥоһуллар.
Ол иһигэр социальнай биэнсийэ, олорор дьиэнэн хааччыйыы, дьиэҕэ тиийэн көрүү-харайыы, ыйдааҕы төлөбүрдэр, социальнай-реабилитациялыыр өҥөлөр, доруобуйаны чэбдигирдэргэ уонна сынньанарга көмө, айан ороскуотун толуйуу, медицинскэй тэрилинэн хааччыйыы, үлэҕэ ылыыга чэпчэтиилэр, о.д.а.
Маны тэҥэ өрөспүүбүлүкэттэн эмиэ кэккэ чэпчэтиилэр бааллар.

Спорт доруобуйаны бөҕөргөтөр
4 тыһыынчаттан тахса киһи физкултууранан уонна спордунан тиһигин быспакка дьарыктанар (ол инбэлииттэр уопсай ахсааннарыттан 7,1 %-ны ылар). 2014 сыл саҥатыгар “Самородок” бассейн базатыгар Адаптивнай физкултуура уонна спорт өрөспүүбүлүкэтээҕи киинэ арыллыбыта. Киин оҕолорго уонна улахан дьоҥҥо доруобуйаларын, санааларын бөҕөргөтөллөрүгэр, уопсастыба толору бырааптаах чилиэннэрэ буолалларыгар туһулаан, элбэх үлэни ыытар.
Манна 19 тренер, 10 инструктор үлэлиир. Хабылыктан, хаамыскаттан саҕалаан, пауэрлифтинг, дзюдо, бочча, волейбол (олорон эрэ), харбааһын, о.д.а. адаптивнай көрүҥнэргэ дьарыктыыллар.
Былырыын XI спорт адаптивнай көрүҥнэрин спартакиадатыгар 681 спортсмен, 18 улуустан 19 хамаанда кыттыбыта. Анастасия Диодорова, Владимир Балынец, Степанида Артахинова курдук паралимпиецтарбыт ситиһиилэрин бары да көрө-истэ сылдьабыт, киэн туттабыт.

+1
0
+1
0
+1
0
+1
0
+1
0
+1
0
+1
0