Сунтаар улууһун доруобуйатын харыстабылын историятыгар өссө биир умнуллубат күн сурулунна – “Чэбдик эйгэ” сурунаал сүрэхтэннэ.
edersaas.ru
Улуустааҕы киин балыыһа кылаабынай бырааһа Светлана Иванова көҕүлээн таһаарбыт иһитиннэрэр-методическай сурунаала өссө электроннай көрүҥнээҕинэн уратылаах. Ол эбэтэр, 2018 сылга үстэ бэчээттэнэн тахсар медицинскэй сурунаалы Play market сыһыарыыга киирэн билсиэххэ сөп.
Светлана Кимовна кинигэ сүрэхтэниитигэр: “Билиҥҥи кэмҥэ балыыһа туһунан иһитиннэриилэр ситэтэ уонна чопчута суох бэриллэллэр, оттон доруобуйа харыстабылын сайдыытын аныгы таһыма баар интеллектуальнай кыаҕы холбооһуну эрэйэр. Биһиги олохпутугар саҥа технологиялар киллэриллэллэринэн сибээстээн, балыыһа дьаһалтата төрөөбүт-үөскээбит Сунтаарбыт улууһун олохтоохторугар медицинаҕа аналлаах сурунаалы оҥорорго быһаарыммыта”, – диэн улууска аан бастаан таһаарыллыбыт өҥнөөх, аныгылыы көрүүлээх медицинскэй сурунаал сыалын-соругун билиһиннэрдэ.
Сүрэхтэниигэ кэлбит үрүҥ халааттаах аанньаллар, ыалдьыттар, тэрилтэлэр салайааччылара нэһилиэнньэҕэ олус туһалаах сурунаал баар буолбутун бэлиэтээн, махталларын эттилэр. Ону сэргэ, сурунаал былааннаммытын курдук тахса турарыгар, кэлэр нүөмэрдэргэ тугу ааҕыахтарын, билиэхтэрин баҕаралларын туһунан санааларын үллэһиннилэр.
Таһаарыы сүрүн эрэдээктэрэ Светлана Иванова “Чэбдик эйгэ” күн сиригэр көрөрүгэр көмөлөспүт, өйөөбүт дьоҥҥо ис сүрэҕиттэн махтанна уонна сэмэй бэлэхтэри туттарда.
Дьоро киэһэни улуус доруобуйатын харыстабылын бэтэрээнэ Розалия Абрамовна Гуляева ыллам ырыаларынан киэргэттэ.
Биир-биир арыйдахха…
“Чэбдик эйгэ” инники сирэйдэригэр кылаабынай быраас эҕэрдэтэ, улуус киин балыыһатын историята уонна бүгүҥҥэ диэри сайдан кэлбит кэрдиис кэмнэр кэпсэммиттэрэ кэрэхсэбиллээх. Эмтэнээччи, ыарыһах балыыһа киэҥ-куоҥ уораҕайыгар муна-тэнэ сылдьыбатын, бириэмэтин сүтэрбэтин туһугар балыыһа комплексын ис бараанын схемата, ханнык отделениеҕа тиийэн, хайа бырааска көрдөрүнүөххэ сөбүн туһунан ыйынньык-матырыйааллар киирбиттэр.
Быйыл үбүлүөйдэрин бэлиэтиир отделениеларга туспа рубрикалар анаммыттар. “Ытык ыалдьыт” рубрикаҕа СӨ доруобуйатын харыстабылын туйгуна, үрдүк категориялаах тиис бырааһа Дмитрий Ивановы кытары интервью ааҕааччылар интэриэстэрин тардар. Балыыһа ыарыһаҕы эмтиир эрэ буолбакка, кини бырааба күөмчүлэммэтигэр кыһанар. Ол да иһин, юрисконсульт Наталья Тимофеева эмтэнээччи эбээһинэһин уонна быраабын туһунан ыстатыйата биир балаһаҕа бэчээттэммит.
Биллэрин курдук, ыарыыны эмтиирдээҕэр сэрэтэр ордук. “Чэбдик олох” уонна “Суһал көмө” рубрикаларга дьаҥы-дьаһаҕы эрдэттэн сэрэтиигэ, чөл олоҕу тутуһарга туһалаах сүбэлэр “остуол кинигэтин” кэриэтэ буолсулар.
Ханнык баҕарар бэчээтинэй таһаарыы ааҕааччыны кытары ыкса ситимнээх эрэ буоллаҕына, уһун үйэлэнэр. Ол да иһин, медицинскэй сурунаалга ыарыһахтар үрүҥ халааттаах аанньалларга махталлара, баҕа санаалара бэчээттэммиттэр.
Надежда ЕГОРОВА, «Саха сирэ» хаһыат, edersaas.ru