Дьокуускай куорат киин болуоссатыгар маҥан баартыктаах кыргыттар, үрүҥ ырбаахылаах уолаттар, сибэккилээх учууталлар, үөрбүт-көппүт төрөппүттэр тоҕуорустулар. Кинилэр Билии күнүн маҥнайгы чуорааныгар муһуннулар.
СӨ бырабыыталыстыбатын бэрэссэдээтэлин эбээһинэһин толорооччу Владимир Солодов үөрэнээччилэри эҕэрдэлээн туран, тыл этэригэр, уопсайа, 150-ча тыһ. оҕо оскуолаҕа үөрэнэрин, ити Саха сирини хас алтыс киһитэ буоларын аҕынна. “Биһиэхэ үөрэх боппуруоһа инники күөҥҥэ турар. Бу эйгэни кытта атыттары тэҥниир табыллыбат уонна учуутал идэтин курдук бочуоттаах атын идэ суох. Учууталлар хайдах үлэлииллэриттэн биһиги инники сайдыытыбыт тутулуктаах”, — диэн бэлиэтээтэ. Итиэннэ дойду бэрэсидьиэнэ Владимир Путин Арассыыйа үөрэх уопсай хаачыстыбатынан уон бастыҥ дойду ахсааныгар киирэригэр сыал-сорук туруорбутун санатта. Сорук туоларын туһугар бары күүспүтүн ууруохпут диэн эттэ.
Оттон СӨ Үөрэҕин уонна наукатын миниистирэ Владимир Егоров өрөспүүбүлүкэ үрдүнэн бүгүн аан маҥнайгытын 15 тыһ. тахса оҕо оскуола боруогун атыллыырын туһунан иһитиннэрдэ. “Эһиги иннигитигэр букатын саҥа билии киэҥ аана арыллар, умунуллубат түгэннэр, эрэллээх доҕоттор күүтэллэр”, — диэн этэн туран ситиһиилэри баҕарда. Оскуола бары үөрэнээччилэригэр, устудьуоннарга туруоруммут сыалларын ситиһиллэригэр, тулуурдаах, үлэһит, үрдүк квалификациялаах үлэһит буолан төрөөбүт дойдуларыгар туһаны аҕалалларыгар баҕарда. Оттон үөрэх үлэһиттэригэр туһаайан, биһиги оҕолорбут билиини ылыылара эһигиттэн тутулуктаах диэн тоһоҕолоон бэлиэтээтэ.
Диктор микрофоҥҥа: “Биэс, түөрт, үс, икки, биир”, — диэн ааҕаатын кытта, сүүһүнэн мустубут оскуола үөрэнээччилэрин чуораана чугдаара тыаһаата. Билии күнүнэн! Үөрэх дьыла саҕаламмытынан!
Людмила ПОПОВА, “Саха сирэ” хаһыат, edersaas.ru
Мария ВАСИЛЬЕВА (СИА) хаартыскаҕа түһэриитэ.