Үөһээ Бүлүү улууһун уонна Үөһээ Бүлүү нэһилиэгин дьаһалталарын таас уораҕайдарын икки ардыларыгар сытар киэҥ тэлгэһэҕэ Киин болуоссаты саҥалыы тута сылдьаллар. Аҕыйах сыллааҕыга диэри манна Ленин пааматынньыга турбута баара…
Тутуу үлэтигэр Дьокуускайтан Владимир Юмшанов генеральнай дириэктэрдээх “Праймер” ХЭУо бэдэрээттэспит. Генеральнай бэдэрээтчит-тэрилтэ прораба Евгений Ипполитов билиһиннэрэринэн, бу күннэргэ билиитэлэри тэлгэтии үлэтин бүтэрдилэр. Аны биир ыйынан силигин ситэрэн, сакаасчыкка – улуус дьаһалтатыгар туттарыахтаахтар.Киһи кэрэхсиирэ баар: болуоссат ортотунааҕы кытархай билиитэлэргэ сиртэн 10-ча см үрдүккэ улуус картата сандааран сытар буолуоҕа. Биллэрин курдук, Үөһээ Бүлүү улууһа Бүлүү уонна Ньурба улуустарын кытта Түҥ уонна Түүкээн үрэхтэринэн быысаһар буолан, сирэ-уота уһун-синньигэс быһыылаах.
Евгений Серафимович: “Карта 16 миэтэрэ усталаах буолар. Дьокуускайга анал сакааһынан оҥоһуллан кэлбитин биһиги таҥан туруоруохпут. Оттон карта үрдүнээҕи матырыйаала киһини уйар халыҥ, дьэҥкир оргөстүөкүлэ, манныгы Екатеринбурга эрэ оҥороллор. Ол анныгар улуус нэһилиэктэрэ үрэхтэригэр, күөллэригэр тиийэ ойууланан көрдөрүллэр. Хараҥаҕа светодиод лаампаларынан сырдатыллар”, — диэн быһааран кэпсээтэ.
Улуус дьаһалтатын дьыалаларын дьаһайааччы Антон Платонов этэринэн, болуоссакка улуус географическай картатын ойуулааһын — улуус баһылыга Владимир Поскачин бэйэтэ толкуйдаабыт идиэйэтэ. Маннык сонун тэрээһин оҕолор кыра эрдэхтэриттэн төрөөбүт-үөскээбит дойдуларын билэ, киэн тутта улааталларыгар туһалаах буолара саарбаҕа суох. Күннээҕи олохпутугар хотуну соҕурууттан, илини арҕааттан араарбат киһи элбэх эбээт.
Василий НИКИФОРОВ, edersaas.ru