Киин быыбардыыр хамыыһыйа Ил Дархан дуоһунаһыгар хандьыдааттары бигэргэттэ

От ыйын 30 күнүгэр СӨ Киин быыбардыыр хамыыһыйата Ил Дархан дуоһунаһыгар Айсен Николаевы, Виктор Губаревы, Гаврил Парахины уонна Владимир Богдановы хандьыдаат быһыытынан бигэргэттэ.  

edersaas.ru

Балаҕан ыйын 9 күнүгэр өрөспүүбүлүкэбит Ил Дарханын талар быыбар буолар. Бэҕэһээ Киин быыбардыыр хамыыһыйа Ил Дархан эбээһинэһин быстах кэмҥэ толорор, «Биир ньыгыл Арассыыйа» баартыйаттан турунар Айсен Николаевы, Ил Түмэн спикерин солбуйааччытын, РФКП баартыйаттан турунар Виктор Губаревы, «АЛРОСА» АХ инженерин, Миирнэй оройуоннааҕы сэбиэтин дьокутаатын, «Сиэрдээх Арассыыйа» баартыйа бэрэстэбиитэлин Владимир Богдановы уонна урбаанньыты, норуот дьокутаатын, ЛДРП баартыйаттан турунар Гаврил Парахины  хандьыдааттарынан ааттаата.  

Хандьыдааттар докумуоннарын бэрэбиэркэлээһин от ыйын 26 күнүгэр бүппүтэ. Сэттэ киһи сайабылыанньа биэрбититтэн, түөрт киһи кыттар. Эрнст Березкин уонна Алексей Лаптев хандьыдаат буолбатылар. Александр Силин докумуоннара ситэтэ суох буолан, киниэхэ извещение ыытыллыбыта.

Санатан суруйдахха, балаҕан ыйын 9 күнүгэр СӨ олохтоохторо Ил Дарханы, Ил Түмэн  дьокутааттарын, Дьокуускай куорат баһылыгын, куорат  Дууматын саҥа састаабын, 15 улуус, 20 нэһилиэк баһылыгын, 22 оройуон уонна 7 нэһилиэк дьокутааттарын талыахтара.

Николай Попов, «Саха сирэ» хаһыат, edersaas.ru