Ыам ыйын 8 -12 күннэригэр Калининград куоракка кик-боксинг “фулл-контакт” уонна “лоу-кик” көрүҥнэригэр улахан дьон уонна уолаттар ортолоругар Арассыыйа чөмпүйэнээтэ ыытылынна. Онно Саха сирин хамаандата барыта уон икки мэтээли ылары ситистэ: улахан дьоҥҥо –сэттэ, уолаттарга – биэс. Бүгүн “Триумф” кииҥҥэ буолбут пресс-кэмпириэнсийэҕэ өрөспүүбүлүкэ сүүмэрдэммит хамаандатын сүрүн тириэньэрэ Андрей Алексеев иитиллээччилэрэ быйыл өтөрүнэн ситиһиллибэтэх көрдөрүүлэнэн үөрдүбүттэрин бэлиэтээн эттэ.
Роман Попов, “Саха сирэ” хаһыат, https://edersaas.ru
Ол курдук, дойду түһүлгэтигэр спорт маастара Николай Винокуров 54 киилэҕэ диэри ыйааһыҥҥа кыһыл көмүс, спорт маастара Вадим Колтовской (57 кг) – үрүҥ көмүс, норуоттар икки ардыларынааҕы кылаастаах спорт маастардара Айаал Местников (51 кг), Денис Андреев (63,5 кг), спорт маастара Виталий Филиппов (60 кг), спорт маастарыгар хандьыдааттар Петр Васильев (51 кг), Семен Алексеев (54 кг)– боруонса мэтээллэри ыллылар. Уолаттарга Дьулусхан Барашков (71 кг) уонна Армен Фероян (91 кг) иккис, Павел Банников (54 кг), Тимофей Сивцев (51 кг), Вадим Насыров (60 кг) үһүс бириистээх миэстэлэргэ таҕыстылар.
Өрөспүүбүлүкэ сүүмэрдэммит хамаандатын сүрүн тириэньэрэ Андрей Алексеев быйылгы чөмпүйэнээккэ дойду 40 регионуттан 326 күүстээх кик-боксер кэлэн күөн көрсүбүтүн, бары ыйааһыннарга аны күһүн Бразилияҕа буолар аан дойду түһүлгэтигэр кыттар быраабы ылар иһин сытыы киирсиилэр буолбуттарын, уолаттарбыт бу көрүҥнэргэ күүстээхтэр кэккэлэригэр сылдьалларын өссө төгүл итэҕэппиттэрин — аҕыс боксертан сэттэтэ мэтээллээх эргиллибитин кэпсээтэ. “Сыалбытын-сорукпутун ситистибит – аан дойду чөмпүйэнээтигэр саха кик-боксера кыттыаҕа”, – диэтэ.
Уолаттарга өрөспүүбүлүкэ сүүмэрдэммит хамаандатын тириэньэрэ Уйусхан Барашков ыйааһыннарыгар миэстэлэспиттэр бары дойду хамаандатыгар хандьыдаатынан ылыллыбыттарын, оттон үрүҥ көмүс призердар Дьулусхан Барашков уонна Армен Фероян аны күһүн Македонияҕа буолар Европа чөмпүйэнээтигэр Арассыыйа аатыттан кыттар чиэскэ тиксибиттэрин эттэ.
Арассыыйа чөмпүйүөнэ, Үөһэ Халыма Зырянкатын хоһууна Николай Винокуров спордунан 2007 сыллаахтан ылсан дьарыктанарын, бастаан утаа, тыа хаһаайыстыбатын техникумугар үөрэнэр кэмигэр, Евгений Окороковка муай-тайынан, спортивнай гимнастиканан үлүһүйбүтүн, онтон 2009 сыл кыһыныттан Андрей Алексеев салалтатынан кик-боксинынан эрчиллэрин, Калининград рингэтигэр үстэ киирсибитин, чөмпүйүөн аатын былдьаһар быһаарыылаах күөн көрсүһүүгэ Хамзат Мерешковы (Ингушетия-Москва) баһыйа туппутун кэпсээтэ. Уонна, түгэнинэн туһанан, киин куорат полициятын начаалынньыгын эбээһинэһин толорооччу Алексей Гарагуляҕа, полиция отделын начаалынньыгын эбээһинэһин толорооччу Николай Ядреевка, Саха Өрөспүүбүлүкэтигэр ис дьыала миниистирэ Владимир Прокопенкоҕа, ийэтигэр Любовь Гаврильевнаҕа, аҕатыгар Валерий Николаевичка, кэргэнигэр Еленаҕа, кини төрөппүттэригэр, чугас доҕотторугар, биир дойдулаахтарыгар өйөбүллэрин, көмөлөрүн иһин махтанарын эттэ.
Пресс-кэмпириэнсийэҕэ кыттыыны ылбыт спорт миниистирин солбуйааччы Марина Захарова, спорт үрдүкү маастарыстыбатын дириэктэрин бастакы солбуйааччы Леонид Спиридонов спортсменнары, тириэньэрдэри ситиһиилэринэн истиҥник эҕэрдэлээтилэр, биир дойдулаахтарын инникитин даҕаны саҥа кыайыыларынан үөрдэ туралларыгар баҕа санааларын тиэртилэр. Николай Винокуровка, Вадим Колтовскойга, Денис Андреевка, хамаанда сүрүн тириэньэригэр Андрей Алексеевка Спорт министиэристибэтин махтал суруктара туттарылыннылар.
Роман Попов, “Саха сирэ” хаһыат, https://edersaas.ru