Кини 17 сааһыгар фроҥҥа барбыта…

Бөлөххө киир:

Бэҕэһээ, ахсынньы 3 күнүгэр, бүтүн Арассыыйа үрдүнэн Биллибэт саллаат күнэ бэлиэтэннэ.

Бу, сыл аайы бэлиэтэнэр өйдөбүнньүк күн ылбычча олохтоммотоҕо.  Аҕа дойду Улуу сэриитин кэмигэр ньиэмэс фашистарын Москва анныттан үүрэр быһаарыылаах кыргыһыыга  дьоруойдуу охтубут сэбиэскэй саллаат кырамтатын Бырааттыы көмүллүүттэн, Ленинград шоссетын 41-с километрыттан, чуолаан бу күн — ахсынньы 3 күнүгэр, 1966 сыллаахха, Москваҕа, Александровсай саадка, Кириэмил истиэнэтин анныгар көһөрөн аҕалбыттара. Бу билигин дьон-норуот хорсун саллаат сырдык аатыгар сүгүрүйэр сирэ…

Биллибэт саллаат күнэ Сэбиэскэй Сойуус уонна Арассыыйа буойуннарын героизмнарын, өлбөт-сүппэт албан ааттарын үйэтитэр ытык аналлаах.

Биһиги дойдубут, өрөспүүбүлүкэбит үрдүнэн үйэтитии үлэтэ салгыы ыытыллар. Лоп курдук бу күнү көрсө Дьокуускайга “Алаас”  кинигэни бэчээттээн таһаарар кииҥҥэ “Мин туспунан санаарҕаамаҥ…”, диэн, уоттаах сэрии толоонугар сураҕа суох сүппүт саха буойуна — эдэркээн уол – Орджоникидзевскай оройуон (Хаҥалас) Өктөм нэһилиэгиттэн төрүттээх Василий Гаврильевич Попов (таптал аата Манчаары) туһунан кинигэ күн сирин көрдө.

Кинигэни Василий Попов сиэн-балта Полина Поликарповна Попова хомуйан оҥорбут. Манна, Дьокуускайдааҕы фельдшерскэй-акушерскай оскуолаҕа (ЯФАШ) үөрэнэ сылдьан, баара-суоҕа 17 сааһыгар аармыйаҕа ыҥырыллан, Ийэ дойдутун көмүскүү  уоттаах сэриигэ барбыт уолчаан, хорсун саллаат  Василий Попов -Манчаары дьонугар фронтан суруктара, кини төрүттэрин кэпсиир матырыйааллар, хаартыскалар, архыып докумуоннара, аймах-билэ дьонун ахтыылара, Василий Попов туһунан араас сылларга “Эдэр коммунист”, “Саха сирэ” хаһыаттарга суруйуулар киирбиттэр.

Саха хорсун саллаатын аата үйэлэргэ умнуллубат.

Вася тиһэх суруга: “Сарсын кыргыһыыга киирэбит!”

Татьяна Маркова, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0