Потребительскэй кирэдьииттээһин биһиги олохпутугар киириэҕиттэн, Россияҕа баантан иэс харчыны ылааччы ахсаана сыл ахсын элбээн иһэр. Маҕаһыынтан таптаабыт малбытын, оннооҕор ипотека нөҥүө кыбартыыра атыылаһан, иэс суотугар олорор буоллубут.
Анивера Акимова, «Саха сирэ» хаһыат, https://edersaas.ru/
Ааспыт нэдиэлэҕэ «Сахамедиа» иһинэн үлэлиир «Барыбыт кыһалҕабыт» бырайыак чэрчитинэн, «Кирэдьиитинэн туһаныы» диэн төгүрүк остуол ыытылынна. Тэрээһиҥҥэ баан үлэһиттэрэ уонна суруналыыстар кытыннылар.
Билигин нэһилиэнньэ сүрүн дохуотуттан аҕыйаҕа суох бырыһыаны кирэдьиит төлөбүрүгэр ыытарын экспертэр быһаарыылара да суох, хас биирдиибит көрө-билэ сылдьабыт. Сорохтор хас да кирэдьиити тэҥинэн ылан, ыйдааҕы хамнастарын барытын бааҥҥа, кирэдьииттиир кэпэрэтииптэргэ «быһалыы» кутан биэрэллэр. Аҥардастыы баан хабалатыгар киирбэт туһугар, кирэдьиитинэн табыгастаахтык туһана үөрэниэхпитин наада.
«Россельхозбаан» Саха сиринээҕи салаатын дириэктэрэ Василий Тимофеев: «Инфляцияны учуоттаан, үбү-харчыны дьиэҕэ мунньубакка, бааҥҥа уурдаран үлүннэрэр, биитэр кирэдьиит ылан сыаналаах малы-салы атыылаһар табыгастаах дии саныыбын», – диэн этэрэ эмиэ да оруннаах. Сөп ээ. Хас да сылы быһа харчыны сыттык анныгар кистии сыппакка, бааҥҥа уурдарар быдан барыстаах. Эбэтэр массыынаны, сыаналаах миэбэли иэс ылан, кыра-кыралаан төлөөбүт ордук курдук.
Ол эрээри коммерческай бааннарга, кирэдьииттиир кэпэрэтииптэргэ үбү-харчыны уурдарарга эмиэ сэрэниэх тустаахпыт. Сорох кэпэрэтииптэр, бааннар үп-харчы кириисиһин «тулуйбакка», моҥкуруут барар түбэлтэлэрэ эмиэ баар. Холобур, «ЯРКО» потребительскэй кэпэрэтиип «эстэн», үлүгэрдээх пайщик харчытыттан ытыс соттон хаалбыта.
Онон судаарыстыбаннай бааннарга үбү уурдарар ордук. Баан салайааччыта иһитиннэрбитинэн, өскөтүн килийиэн сарбыйыыга түбэспит, биитэр хамнаһа лаппа кыччаабыт буоллаҕына, кирэдьиит ылбыт бааныгар биллэрэн, кинилэр утары баран, анал сөбүлэһии түһэрсиэхтэрин сөп эбит.
Анивера Акимова, «Саха сирэ» хаһыат, https://edersaas.ru/