Кириэстээхтэр кэрэ куоластаах аанньаллара

Бөлөххө киир:

Сунтаар улууһун Кириэстээх с. учаастактааҕы балыыһатын кылаабынай бырааһа Любовь Павлованы биир дойдулаахтара доруобуйа харыстабылын тэрийиигэ улахан үөрүйэхтээх, ирдэбиллээх уонна ылсыбытын тиһэҕэр тириэрдэр салайааччы быһыытынан үрдүктүк сыаналыыллар.

Надежда ЕГОРОВА, «Саха сирэ» хаһыат, edersaas.ru 

Любовь Алексеевна эмчит үрдүк үөрэҕин бүтэрээт, Доруобуйа харыстабылын министиэристибэтин анааһынынан Кириэстээхтээҕи балыыһаҕа кылаабынай бырааһынан үлэлии кэлбитэ.

Эдэр киһини үлэтин бастакы күннэриттэн улахан кэлэктииби салайар талааннаах салайааччы буола үүнүөҕэр тута эрэммиттэрэ. Кырдьыга да, Любовь Павлова тыа сирин нэһилиэнньэтин ыарыыларын учуоттаан, кинилэр доруобуйаларын тупсарарга тус сыаллаах үлэни ыытан барбыта.

1980-1993 сылларга сытар уонна көрдөрүнэр балыыһалар биир дьиэҕэ бааллара. Бу кэмнэргэ «Кириэстээх» сопхуос үлэтинэн-хамнаһынан, туруу үлэһит дьонунан өрөспүүбүлүкэҕэ улаханнык биллэр кэмэ этэ. Үлэ күөстүү оргуйар буолан, нэһилиэнньэ ахсаана элбиир чинчилээҕэ. Ону таба таайан, сопхуос ыстаарсай прорабынан үлэлиир кэргэнэ Григорий Николаевич Павлов бырайыагынан 1993 с. амбулатория туспа дьиэтэ тутуллан үлэҕэ киллэриллибитэ. Онон, нэһилиэк олохтооҕо амбулаторияттан ылар көмөтө хаачыстыбалаах буоларыгар сөптөөх усулуобуйа тэриллибитэ. Кылаабынай быраас туруорсан, үлэһиттэр ахсааннара эбиллибитэ. Тииһи эмтиир кабинет, клиническэй лаборатория уонна физиокабинет аһыллыбыттара.

Өссө кэлин эмиэ кэргэнэ, СӨ Бочуоттаах тутааччыта Григорий Павлов өйөбүлүнэн сытар балыыһа дьиэтин саҥардыы бырайыагын оҥорбуттара. Ол түмүгэр балыыһаҕа олохтоох өрөмүөн оҥоһуллубута, материальнай-техническэй база тупсарыллыбыта. Аныгы кэм ирдэбилигэр эппиэттиир сытар балыыһа билигин суукканы быһа үлэлиир 7 куойкатыгар уонна күнүскү 2 куойкатыгар Кириэстээх уонна чугастыы сытар Куокуну олохтоохторо эмтэнэллэр. Кириэстээхтэр үчүгэй базалаахтарын учуоттаан, манна 2015 с.Сунтаар улууһун эмчиттэрин семинара ыытыллыбыта элбэҕи кэрэһилиир.

Ханнык баҕарар кэлэктиип үлэтэ-хамнаһа, ис эйгэтэ салайааччыттан быһаччы тутулуктаах. Кириэстээхтэр аанньал курдук саныыр үрүҥ халааттаах Любовь Алексеевналара каадырдарын таһымнарын, категорияларын үрдэтиигэ эмиэ улахан үлэни ыытар. Кэлэктиипкэ доруобуйа харыстабылын икки туйгуна баар.

Үлэҕэ-хамнаска итэҕэстэр да суох буолбатахтар. Кылаабынай быраас ол итэҕэстэри туоратарга былааннаахтык үлэлиир. Нэһилиэнньэҕэ ыытыллар диспансеризация, ыарыыны быһаарыы уонна эмтээһин хаачыстыбалаах буоларыгар улахан болҕомтотун уурар. Сыстыганнаах ыарыылары эрдэттэн сэрэтэргэ, ийэ уонна оҕо доруобуйалара айгыраабатыгар бу сылларга мунньуммут билиитин, үөрүйэҕин туһанар. Ону таһынан бэйэтин үөрүйэҕин атастаһарга, үлэһиттэригэр сүбэ-ама биэрэргэ бириэмэ булар.

Кириэстээх орто оскуолата Любовь Алексеевна көҕүлээһининэн «2010-2016 сс. – доруобуйа» бырагыыраманы ылынан үлэлиир. Бырагыраама чэрчитинэн кылыыбанй быраас кэлэктиибин кытыннаран, оскуолаларга лециялары ыытар.

«Медик» ансаамбылтан кынаттанан

Любовь Алексеевна ыарахан үлэтин быыһыгар «Кустук» дьахталлар уопсастыбаннай тэрилтэлэрин актыыбынай кыттыылааҕа. Бу уопсастыбаннай тэрилтэ Сочи к. «Хара муора кытылыгар» фестивальга кыттан, I истиэпэннээх лауреат буолан тураллар. Ааспыт сыл бүтүүтүгэр «Кыһын Саха сириттэн саҕаланар» фестиваль чэрчитинэн Арктика уонна Сибиир норуоттарын фольклорнай үҥкүүлэрин аан дойдутааҕы фестивалыгар кыттыбыттара.

Любовь Алексеевна устудьуоннуур сылларыгар «Медик» вокальнай-инструментальнай ансаамбыл солбуллубат ырыаһыта этэ. Ол да иһин, күн бүгүҥҥэ диэри уус-уран самодеятельноска, култуурунай-маассабай тэрээһиннэргэ истиҥ-эйэҕэс куолаһынан биир дойдулаахтарын үөрдэр. Уус-уран самодеятельность куонкурустарын хас да төгүллээх лауреата, «Леди Босс» номинация кыайыылааҕа.

Кириэстээххэ эрэ буолбакка, улууска, өрөспүүбүлүкэҕэ ытыктанар Павловтар алаһа дьиэлэрин хаһаайката, түөрт оҕо тапталлаах ийэтэ, алта сиэн минньигэс эбээтэ үчүгэй иитиилээх оҕолорун иһин оскуола, нэһилиэк Махтал суруктарынан бэлиэтэммитэ. Павловтар араас култуурунай-маассабай тэрээһиннэргэ үбүнэн-харчынан уонна туһалаах сүбэлэринэн куруук көмө-имэ буолаллар.

Ити курдук, Любовь Алексеевна Павлова күн бүгүҥҥэ диэри олох үөһүгэр сылдьар. Талан ылбыт идэтинэн үтүө суобастаахтык үлэлээн, биир дойдулаахтарын ытыктабылларын ылыан ылар. Оттон кириэстээхтэр «Любовь Алексеевна дуо?» дэтэр үрүҥ халааттаах аанньаллаахтарынан киэн тутталлар.

ЫСПЫРААПКА:

1985 с. СГУ медицинаҕа факультетын «эмтээһин дьыалата» отделениетын бүтэрбитэ.

2005 с. «СӨ доруобуйа харыстабылын туйгуна» ааты ылбыта.

2006, 2010 сылларга «Кириэстээх нэһилиэгэ» муниципальнай тэриллии дьокутаатынан талыллыбыта.

2008 с. РФ Доруобуйа харыстабылыгар уонна социальнай сайдыыга министиэристибэтин Бочуотунай Грамотатынан наҕараадаламмыта.

2015 с. – «Кириэстээх сэлиэнньэтин бочуоттаах олохтооҕо».

Надежда ЕГОРОВА, «Саха сирэ» хаһыат, https://edersaas.ru

+1
0
+1
0
+1
0
+1
0
+1
0
+1
0
+1
0