Суорун Омоллоон аатынан Опера уонна балет судаарыстыбаннай тыйаатырын иннигэр, бүгүн, ыам ыйын 24 күнүгэр, “Живи и здравствуй, Русь святая!” диэн Славянскай сурук-бичик уонна култуура күнүгэр аналлаах, быйыл 26-с сылын бэлиэтэнэр үөрүүлээх тэрээһин кэмигэр СӨ Бырабыыталыстыбатын Бэрэссэдээтэлин солбуйааччы Алексей Дьячковскай Төрөөбүт тыллары араҥаччылааһын, үөрэтии уонна сайыннарыы эйгэтигэр ситиһиилэрин иһин СӨ Аҕа Баһылыгын бириэмийэтин туттарда.
Татьяна Маркова, «Саха сирэ» хаһыат, edersaas.ru
Ол курдук, славянскай суругу-бичиги, култуураны, духуобунаһы сайыннарыыга, Саха сирин элбэх омуктаах норуоттарын сомоҕолооһуҥҥа кылааттарын иһин СӨ Аҕа Баһылыгын Кирилл уонна Мефодий ааттарынан бириэмийэтин быйылгы лауреаттарынан М.К.Аммосов аатынан ХИФУ нуучча тылыгар кафедратын профессора, настаабынньык Галина Авксентьевна Мординова уонна “Раздолье” нуучча ырыатын норуодунай хорун уус-уран салайааччыта, СӨ култууратын үтүөлээх үлэһитэ Лидия Андреевна Яйлиян буоллулар.
Оттон СӨ Үөрэҕин уонна наукатын министиэристибэтин “Учитель изящной словесности” анал бириэмийэтэ үүнэр көлүөнэни нуучча тылыгар уонна литературатыгар үөрэтиигэ үрдүк көрдөрүүлэрин иһин Таатта улууһун Ытык Күөллээҕи А.И.Софронов-Алампа аатынан 1N-дээх орто оскуола нуучча тылыгар уонна литературатыгар учуутала Татьяна Васильевна Никифороваҕа уонна Горнай улууһун Маҕарастааҕы Л.Н.Харитонов аатынан орто оскуола нуучча тылыгар уонна литературатыгар учуутала Луиза Николаевна Тимофееваҕа туттарылынна.
—Мин СГУ РОЯШ — саха оскуолатыгар нуучча тылын үөрэтиигэ салаатын бүтэриэхпиттэн, 28-с сылбын учууталлыыбын. Ийэм Калисфена Васильевна Бугаева нуучча тылын учуутала буолан, бу идэни талбытым. Сыл аайы оҕолортон ОГЭ, ЕГЭ тутабын. Кылаас салайааччытабын. Быйылгы 10-старым билигин кылаастан кылааска көһөр эксээмэннэрин туттара сылдьаллар. Маннык үрдүк наҕарааданы ылыым миигин элбэххэ эбээһинэстиир, — диэтэ Л.Н.Тимофеева, Маҕарастааҕы Л.Н.Харитонов аатынан орто оскуола биир бастыҥ учуутала.
Татьяна Маркова, edersaas.ru