Балаҕан ыйын 8 күнүгэр Дьокуускайга дьоппуон омук култууратын уонна тылын таптааччылар «Кизуна» кулууптара бастакы күһүҥҥү бэстибээли тэрийэн ыытта.
Бэстибээл Орджоникидзе болуоссакка дьоппуоннар үгэс буолбут «Токио-ондо» уонна «Ава-одори» диэн үҥкүүлэрин көрдөрөр хаамыынан саҕаланна. Хаамыыга ХИФУ омук филологиятын уонна регионоведениетын институтун илиҥҥи тыллар уонна дойдуну үөрэтэр кафедраларын устудьуоннара күүс-көмө буоллулар.
Бэстибээл сүрүннээн куорат сынньанар паркатын сайыҥҥы сыанатыгар ыытылынна. Кулууп бэрэссэдээтэлэ Петр Шишигин эҕэрдэтин кэнниттэн «Россия—Япония» уопсастыба Саха сирин регионнааҕы салаатын уопсастыбаннай тэрилтэтин бэрэссэдээтэлэ Николай Барамыгин ыччат түмсэн, бэйэлэрин күүстэринэн тэрийбит саҕалааһыннарын өйүүрүн биллэрдэ.
Бу сэргэх тэрээһиҥҥэ кэлбит ыалдьыттар «Го» остуол оонньуутугар, куораттааҕы киинэ саалаларын бириистэригэр биктэриинэҕэ кыттан, Япония курдук дойду туһунан элбэҕи биллилэр-көрдүлэр. «Кизуна» кулууп чилиэннэрэ уонна илиҥҥи тыллар уонна дойдуну үөрэтэр кафедра устудьуоннарын кытта үҥкүүлээн, ыллаан күһүҥҥү бырааһынньыгы киэргэттилэр.
Ону таһынан «Ресторан Масамунэ» бүлүүдэлэрин амсайан, «Дэйли Март» маҕаһыын бородууксуйатын атыылаһан астынан, дуоһуйан бардылар.
Онон, кэлэр өттүгэр «Кизуна» кулууп маннык тэрээһиннэрэ өссө да ыытыллалларыгар, куорат олохтоохторугар дьоппуон тылын, култууратын билиһиннэрэ туралларыгар баҕа санаабытын тириэрдэбит.
Алеся АНДРЕЕВА, edersaas.ru
Михаил ПЛАТОНОВ түһэриилэрэ