От ыйын 5 күнүгэр, Москваттан 250 км тэйиччи сытар Владимирскай уобаласка, Клязьма өрүс кытылыгар, Бүтүн Арассыйатааҕы ыччат форума буолан ааста. Сахабыт сириттэн «Эдэр гвардия» региональнай штабын чилиэнэ Раиса Контоева, эдэр тутааччылар бэрэссэдээтэллэрэ Иван Макаров, Кэбээйи улууһун ыччатын «Дабаан» түмсүүтүн бэрэссэдээтэлэ Анисья Маркова «Эдэр дьокутааттар уонна лидердэр» диэн форум иккис сменатыгар кытыннылар. Үөрэтэр, сайыннарар, ыччаты түмэр киэҥ бырагырааммалаах форумҥа Бэдэрээссийэ Сэбиэтин чилиэнэ Дмитрий Азаров, Судаарыстыбаннай Дума депутаттара, үрдүк сололоох араас тойоттор Владимир Жириновскай, Дмитрий Зюганов, Сергей Миронов, Сергей Неверов кэлэн көрүстүлэр, сүбэ-ама биэрдилэр.
Форум чэрчитинэн «Бырайыактар кэнбиэйэрдэрэ» диэн тэрээһин ыытыллынна. Манна «Недвижимость республики» тэрилтэ сүрүннүүр дириэктэрэ Иван Макаров «Всероссийский молодежный строительный форум» диэн бырайыагын көмүскээн дьүүллүүр сүбэ биһирэбилин ылла.
Саха ыччата араас дьону кытары алтыһан, санаа атастаһан, харахпыт аһылынна — диэн кэпсиир кини. Кыттыылаахтар бу маннык форумнар туһалаахтарын бэлиэтииллэр. Санатан эттэххэ, бу тэрээһин быйыл иккис сылын ыытыллар.
Дойдуга маннык улахан таһымнаах форумнары чугастааҕы эбэ аатын киллэрэн ааттыыллар. Холобур, Селигер күөл тулатыгар ыытыллыбыт «Селигер» оннооҕор биһиэхэ кэлэн «СахаСелигер» диэн сүрэхтэнэн турардаах. Билигин ити форум дьүһүн кубулуйан «Синергия Севера» диэн ааттаммыта. От ыйын 21-25 күннэригэр Орто Дойдуга буолуохтаах.
Ульяна ЗАХАРОВА,
Утум ЗАХАРОВ.
Подпись фото:
Раиса Контоева бииргэ үлэлээбит хамаандатын кытта.