Иллэрээ күн Москваҕа, НХСБ 75-с павильонугар мас тардыһыытыгар эр дьоҥҥо уонна дьахталларга дойду дархан мадьынытын быһаарар күрэхтэһии түмүктэннэ. Көһүтүллүбүтүн курдук, дьахталларга Татьяна Григорь (Саха сирэ), эр дьоҥҥо Виктор Колибабчук (Вяземь) аҥаардастыы аатырдылар.
Дьахталларга Саха сирин өссө биир мадьыныта Саина Седалищева тахсыылаахтык күрэстэспитин бэлиэтиир тоҕоостоох. Кини түмүк киирсиигэ Татьяна Григорьга эрэ хотторон, бочуоттаах иккис миэстэни ылла. Надежда Осипова (Чувашия), Светлана Тихонова (Урал), Мария Чудинова (Пермь), Татьяна Рублева (Киров уобалаһа) бириистээх миэстэлэргэ таҕыстылар.
Эр дьоҥҥо ааттаах-суоллаах Виктор Колибабчугу баһыйар баабый быйыл да көстүбэтэ. Виктордыын араа-бараа таһымнаах Андрей Маркин (Свердловскай уобалас) бу да сырыыга эмиэ иккис миэстэнэн дуоһуйарга күһэлиннэ. Эрчим Баппаҕай (Саха сирэ), Роман Калинин (Москва уобалаһа), Рамиг Нуруев (Хабаровскай), Юрий Протопопов (Саха сирэ) мас тардыһыыга дойду призердарынан буоллулар.
Роман Попов, “Саха сирэ” хаһыат