«Саха сирин киэн туттуута» норуот бириэмийэтин «Наука диэйэтэлэ» номинациятыгар куоластааһын түмүктэннэ. Кыайыылаах билиннэ. Кини кимий?
edersaas.ru
Учуонайдар «киирсиилэригэр» кыайыылааҕынан Саха сиринээҕи Биир кэлим медицинскэй кыһалҕа научнай киинин наукаҕа дириэктэри солбуйааччы Константин Степанов буолла. Учуонай Бүлүү улууһуттан төрүттээх.
Кыайыылаах интэриниэт-куоластааһыҥҥа 1419 куолаһы хомуйда. Ол иһигэр 285 куолас — социальнай ситимнэргэ.
Атын кыттааччы учуонайдар куоласка тиксиилэрэ маннык буолла:
Карл Башарин, ХИФУ Мединститутун анатомия кафедратын сэбиэдиссэйэ — 737 куоластаах. СО РАН ньиэп уонна гаас кыһалҕаларын чинчийэр институтун сүрүннүүр сортруднига Юлия Глязнецова — 709 куолас, ХИФУ Пединститутун профессора Мария Прокопьева — 683 куолас, ХИФУ МИ«Геномная медицина» клиника үөрэтэр-чинчийэр лабораториятын кылаабынай научнай сотруднига Надежда Максимова — 532 куолас.
Константин Степанов саха норуотун аһылыгын чинчийэр учуонай. Кини экологическай өттүнэн ыраас технологиялаах олохтоох аһы-үөлү үөрэтэр уонна пропагандалыыр. Номинация кыайыылааҕа хотугу таба муоһуттан «Табапан» диэн сериялаах ас-үөл бородууксуйатын 27 саҥа көрүҥүн, 2 БАД-ы, 16 косметическай уонна гигиеническэй крем-оҥоһуктары чинчийэн үөрэппит.
Тыа хаһаайыстыбатын наукатын доктора, Саха сирин наукаҕа үтүөлээх диэйэтэлэ Николай Степанов санаатын маннык үллэһиннэ:
— Миигин номинацияҕа кытыннараары сайаапка биэрбиттэрин билбэт этим. Дьон миигин билэллэригэр уонна куоластарын биэрэн өйөөбүттэригэр барҕа махталбын тиэрдэбин. Арааһа, дьон-сэргэ элбэх куолаһы биэриитигэр мин бүгүҥҥү күҥҥэ тирээн турар боппуруоска олохтоохтук үлэлэһэрим улахан оруолу ылла быһыылаах. Миэхэ араас оскуолалартан үгүс педагог төлөпүөнүнэн сибээстэһэ сылдьыбыттара. Мин кэлиҥҥи сылларга оскуола үөрэнээччилэригэр анал научнай чинчийэр үлэни ыытабын. Ону тэҥэ Тыа хаһаайыстыбатын академиятын уонна ХИФУ устудьуоннара, мин биир дойдулаахтарым уонна кэллиэгэлэрим улаханнык өйөөтүлэр. Онон миэхэ куоластаабыт дьоҥҥо барҕа махталбын тиэрдэбин. Чугастааҕы былааным — олохтоох аһы-үөлү быйыл күһүн быыстапкаларга көрдөрүү.
Өрөспүүбүлүкэтээҕи «Наука диэйэтэлэ» номинацияҕа өрөспүүбүлүкэ 11 улууһуттан 19 наука диэйэтэлэ кыттыыны ылла. Куонкуруска кыттыбыт учуонайдар палеонтологияны, геохимияны, мэдиссиинэни, ирбэт тоҥу, аһылыгы, молекулярнай генетиканы, литератураны, нанотехнологияны чинчийэллэр.
«Саха сирин киэн туттуута» бырайыак Саха сирин судаарыстыбаннаһын күнүгэр биллэриллибитэ. «Бастыҥ» номинация иһин куонкурус үлэ түмүгүн таһаарар, талааннары көрдүүр куоластааһын буолбатах. Бу аттыбытыгар үлэлии сылдьар, таптыыр идэлэригэр таба тайаммыт үлэттэн дьоллонор дьону кэмигэр бэлиэтээн көрүү буолар. Кинилэргэ махтал тылларын саамай күөгэйэр күннэригэр сырыттахтарына этэн үөрдүү.
«Саха сирин киэн туттуута» норуот бириэмийэтин генеральнай спонсора — «Көмүлүөк» саха иһитин оҥорор фирма.
Елена ПОТОЦКАЯ, «Саха сирэ» хаһыат, edersaas.ru