Бүгүн сорох сонуну киэҥник тарҕатар сириэстибэлэргэ Саха сирин Ил Дархана Егор Борисов сүрэҕэ ыалдьан балыыһаҕа киирбитин курдук суруйдулар.
“Мин бэйэм былааннаабытым курдук, балыыһаҕа сылдьыбытым. Ол гынан баран, суһаллык балыыһаҕа киирэр наада суоҕа”, – диэн Егор Борисов иһитиннэрдэ.
“Сорох сонуну киэҥник тарҕатар сириэстибэлэр миигин сүрэҕэ ыалдьан, Москваҕа суһаллык балыыһаҕа киирбитим курдук иһитиннэрбиттэр этэ. Дьиҥэр, мин муус устарга уоппускам кэмигэр Кореяҕа оҥотторбут былааннаах эпэрээссийэм кэнниттэн бэҕэһээ эпэрээссийэм сиигин ыллараары сылдьыбытым. Ол сүрэх-тымыр үлэтигэр туох да сыһыана суох. Дьолго, доруобуйам этэҥҥэ. Мин балыыһаҕа сырыым туһунан сыыһа суруйбутуттарыттан хомойобун”, – диэн Егор Борисов Фейсбугар суруйда.
Манна сыһыаран эттэххэ, Саха сирин баһылыга муус устар 2 күнүгэр уоппускаҕа барбыта. Өрөспүүбүлүкэ баһылыгын эбээһинэһин толоруу бырабыыталыстыба бэрэссэдээтэлэ Евгений Чекиҥҥэ сүктэриллибитэ.
“Саха сирэ” хаһыат, edersaas.ru