«Коркиҥҥа” кыһыл көмүс мэтээлин ахсаанынан Александр Богомоевтуун тэҥнэһэр бөҕөһү көрүөхпүт дуо?
Сарсын Дьокуускайга “Триумф” спорт киинигэр Саха АССР, РСФСР, ССРС үтүөлээх тириэньэрэ Дмитрий Коркин кэриэһигэр көҥүл тустууга норуоттар икки ардыларынааҕы онус турнир үөрүүлээх аһыллыыта буолуоҕа. Бу иннинэ ыытыллыбыт тоҕус күрэхтэһиигэ 24 дойдуттан 197 бөҕөс 262 мэтээли ылан турар. Оттон чөмпүйүөннэринэн 55 тустуук буолбута.
Улуу тириэньэр аатынан норуоттар икки ардыларынааҕы турнир бүгүҥҥү күҥҥэ соҕотох үс төгүллээх кыайыылааҕынан Александр Богомоев буолар, 2011, 2012 уонна 2014 сыллардаахха кини пьедестал үрдүкү үктэлин дабайан турар. Тоҕус бөҕөс иккилии кыайыылаах — Леонид Спиридонов, Иннокентий Иннокентьев, Владислав Андреев, Виктор Рассадин (Саха сирэ), Сат Опан (Тыва), Юрий Белоновскай (Красноярскай), Батраз Газзаев (Кемерево), Ацамаз Санакоев (Осетия) уонна Евгений Жербаев (Бурятия).
Коркин турнирын түөртүү мэтээлин хаһаайыннарынан саха тустууктара Иннокентий Иннокентьев (2 кыһыл көмүс, 2 үрүҥ көмүс), Семен Семенов (1 кыһыл көмүс, 2 үрүҥ көмүс, 1 боруонса), Ньургун Скрябин (1 кыһыл көмүс, 3 боруонса) буолаллар. Кинилэри кытта биир кэккэҕэ монгол бөҕөһө Пурэвжав Унурбат (1 үрүҥ көмүс, 3 боруонса) турар.
Оттон норуоттар ики ардыларынааҕы күрэхтэһии кыһыл көмүс, үрүҥ көмүс, боруонса мэтээллэрин толору “кавалердарынан” Айаал Лазаревы (Саха сирэ), Булат Батоевы (Бурятия) уонна Семен Семеновы ааттыахпытын сөп. Манна Семен Семенов кыһыл көмүһү, боруонсаны кытта икки үрүҥ көмүс мэтээллээҕин санатар тоҕоостоох.
Тоҕус төгүл ыытыллыбыт күрэхтэһиигэ 24 дойду тустууктара бириистээх миэстэлэри ылбыттара: Казахстан (4 кыһыл көмүс, 3 үрүҥ көмүс уонна 8 боруонса), Монголия (3 – 4 – 16), Белоруссия (3 – 2 – 5), Грузия (3 – 1 – 3), Кыргызстан (2 – 4 – 1), АХШ (2 – 3 – 6), Иран (2 – 1 – 4), Польша (2 – 1 – 0), Украина (1 – 3 – 2), Армения (0 – 1 – 1), Азербайджан (0 – 2 – 3), Молдова (0 – 1 – 0), Турция (0 – 3 – 1), Болгария (0 – 0 – 3), Словакия (0 – 1 – 1), Япония (1 – 2 – 0), Румыния (0 – 1 – 0), Таджикистан (0 – 1 – 0), Греция (0 – 0 – 1), Канада (0 – 0 – 1), Кытай (0 – 0 – 1), Тунис (0 – 0 – 1), Узбекистан (0 – 0 – 1).
Роман Попов, “Саха сирэ” хаһыат