Саха АССР, РСФСР, ССРС үтүөлээх тириэньэрэ Дмитрий Коркин кэриэһигэр Х норуоттар икки ардыларынааҕы турнир балаҕан ыйын 30 — алтынньы 1 күннэригэр “Триумф” спорт киинигэр ыытыллыаҕа. Бүгүҥҥү туругунан, үбүлүөйдээх түһүлгэҕэ, Арассыыйаны аахпакка туран, сүүрбэ алта дойду күүстээх бөҕөстөрүн кытыннарарын номнуо бигэргэтэн олорор.
Дьокуускайга Армения, Болгария, Германия, Греция, Грузия, Польша, Румыния, Финляндия, Кытай, Индия, Соҕуруу Корея, Эстония, АХШ, Афганистан, Белоруссия, Казахстан, Кыргызстан, Монголия, Молдова, Турция, Израиль, Япония уонна Венгрия хамаандалара кэлиэхтэрэ.
Спорка үрдүкү маастарыстыба оскуолатын дириэктэрин солбуйааччы Леонид Спиридонов иһитиннэрбитинэн, бу күннэргэ Иран хамаандата улуу тириэньэрбит турнирыгар кыттарын биллэрбит, билигин визаларын оҥорторо сылдьаллар.
Роман Попов, “Саха сирэ” хаһыат, edersaas.ru