П.А. Ойуунускай аатынан Саха тыйаатырыгар V норуоттар икки ардыларынааҕы киинэ бэстибээлэ түмүгүн биллэрдилэр. Бэстибээл бастыҥ киинэтинэн Дмитрий Давыдов устубут “Костер на ветру” киинэтэ ааттанна. Оттон документальнай киинэлэргэ Надежда Захарова устубут “Огонь” киинэтэ кыайыылаах таҕыста. Бэстибээл сүрүн бирииһинэн уонна бэлиэтинэн кыһыл көмүс хаар ачыкыта буолар. edersaas.ru
Түөрт күннээх бэстибээл устата Дьокуускайга 19 араас дойдуттан 60-ча киинэ аҕалан көрдөрдүлэр, маастар-кылаастар ыытылыннылар. Маны таһынан, Арассыыйа, аан дойду киинэтин бас-көс дьоно ыалдьыттаатылар.
“Саха киинэтин сайдыытыгар кылаатын иһин” диэн кыһыл көмүс хаар ачыкытын сахалартан бастакынан идэтийбит режиссер Алексей Романов ылла. Маны сэргэ, Кыргызстантан кэлбит “Завещание отца” киинэни устубут бөлөххө П.А. Ойуунускай аатынан судаарыстыбаннай бириэмийэ лауреата, Арассыыйа бочуоттаах кинематографиһа оператор Иннокентий Аммосов аатынан анал бирииһи туттардылар.
Үрүҥ көмүс хаар ачыкыларын барытын “Айар аат” устубут “Кэрэл” киинэтэ “хомуйда”. “Сахалыы бастыҥ киинэ” номинацияҕа кыайыыны таһынан, бу киинэҕэ оонньообут Айталина Лавернова — «Дьахтар бастыҥ оруола», оттон Валентин Макаров «Эр киһи бастыҥ оруола» номинацияларга кыайдылар. Аны бу үс бирииһи тэҥинэн ылбыт киинэ ааспыт нэдиэлэҕэ Анапаҕа түмүктэммит 26-с норуоттар икки ардыларынааҕы «Киношок» бэстибээлгэ Гран-при буолан аатырда.
Документальнай киинэлэри туспа сыаналаатылар. Ол курдук, анал дипломунан Сардаана Барабанова уонна Яна Худаева устубут “Хранители тундры” киинэлэрэ наҕараадаланна. Оттон “Бастыҥ документальнай киинэ” ааты уонна кыһыл көмүс хаар ачыкытын нуучча режиссера Надежда Захарова “Огонь” киинэтэ ылла.
Бэстибээл сүрүн куонкуруһугар аҕыс киинэ куоталаста. Манна анал бириистэри Соҕуруу Кэриэйэ режиссера Ким Ким Дук “Сеть” киинэтэ уонна нуучча драмата “Аритмия” ыллылар. Бастыҥ үлэлээх режиссерунан “Саамская кровь” устубут Аманда Керналл ааттанна. Сүрүн бирииһи – кыһыл көмүс хаар ачыкытын Амматтан сылдьар режиссер Дмитрий Давыдов “Костер на ветру” киинэтинэн ылла. Бу киинэ үгүс норуоттар икки ардыларынааҕы бэстибээллэргэ ситиһиилэрдээх. Режиссер Дмитрий Давыдов: “Мин киинэҕэ сылдьан дьон киинэбитин хайдах ылынарын көрөрбүн сөбүлүүбүн. Бэстибээлгэ “Костер на ветру” көрдөрбүттэригэр олус элбэх киһи сылдьыбыт этэ, араас санааны истибитим. Көрөөччүлэрбэр, дьүүллүүр сүбэҕэ улахан махталбын тиэрдэбин”, — диэн санаатын үллэстэр.
ЫСПЫРААПКА
«Костер на ветру» киинэни 2014 сыл күһүнүгэр Аммаҕа 15 күн иһигэр устубуттара, сүрэхтэниитэ быйыл муус устар 14 күнүгэр буолбута. Киинэ жанра – драма. Манна тыа сирин олоҕо, олохтоохтор бэйэ-бэйэлэрин кытта сыһыаннара көстөр. Ис хоһоонуттан быһа тардан кэпсээтэххэ, улахан айдаан, киһи өлөрсүүлээх быһылаан кэнниттэн биир дэриэбинэҕэ олорор кырдьаҕастар тустарынан буолар. Сүрүн оруолларга – Алексей Устинов, Николай Солдатов, Михаил Лазарев, Радислав-Кудай Захаров оонньоотулар. Кинилэр Амма норуодунай театрын артыыстара буолаллар.
Киинэни Дмитрий Давыдов бэйэтэ режиссердаабыт. Кини аата саха киинэтин эйгэтигэр саҥа, сонун. Дмитрий «Костер на ветру» киинэ киэҥ экраҥҥа тахса илигинэ маннык диэн санаатын үллэстэн турардаах:
— Идэтийбэтэх артыыстары кытта үлэлиир чэпчэки эбит. Биир дойдулаахтарым буоланнар, хас биирдиилэрин билэрбин, онон оруоллары бэйэм түҥэппитим. Урут хаһан даҕаны киинэҕэ уһуллубатах буоланнар, бэйэлэрэ хайдах баалларынан оонньоотулар. Ол быдан итэҕэтиилээхтик көһүннэ. Бу киинэни икки сыл аннараа өттүгэр устубуппут, онтон үп-харчы булбаккабыт, киинэ үлэтэ биир сыл тохтуу сылдьыбыта. Устууга наада буолбут харчыны үксүн бэйэм уйуммутум, тыа сиригэр уһуллубут буолан улахан бүддьүөт наадата да суох курдук этэ. Кэнэҕэс араас фестивалларга кыттыахпын баҕарабын, киинэни кытта ыкса үлэлиир былааннаахпын.
Саҥа саҕалыыр режиссерга номнуо идэтийбит оператор Иван Семенов, звукооператор Иннокентий Сивцев, худуоһунньук Сергей Слепцов күүс-көмө буолбуттар.
edersaas.ru, СИА хаартыскаҕа түһэриилэрэ