Бүгүн Москва бириэмэтинэн күнүс үс чааска Краснодар кыраайын Крым тумул арыытын кытары ситимниир муоста арылынна. Муоста аһыллыытыгар РФ бэрэсидьиэнэ Владимир Путин кыттыыны ылла.
Владимир Путин Краснодар кыраайыттан Таманьтан Крым Керчь куоратыгар диэри “КАМАЗ” массыынаны бэйэтэ ыытан барда. Баара-суоҕа 15 мүнүүтэ иһигэр тутууга сылдьыбыт улахан массыыналар колонналара анараа биэрэги булла.
“Бу муоста тутуутун тэрийэн ыытааччылар, кырдьыга даҕаны, улахан үлэни оҥордулар. Кинилэр судаарыстыбаннай интэриэһи бэйэлэрин тус уонна биир бөлөх интэриэһиттэн ойуччу туттулар. Бу күн сапердарга, археологтарга, учуонайдарга, конструктордарга, инженердарга, тутааччыларга истиҥ эҕэрдэбин уонна махталбын тириэрдэбин. Тутууга 10 тыһыынчаттан тахса киһи үлэлээтэ. Тутуу үгэнигэр бу сыыппара 15 тыһыынчаттан тахса сылдьыбыта. 220 тэрилтэ үлэлээтэ. Крым өрөспүүбүлүкэбитигэр эрэ буолбакка Россия бүтүннүүтүгэр бу сүҥкэн суолталаах бырайыак. Салгыы да бу курдук улахан тутуулары дойду үрдүнэн киллэрэн иһиэхпит”, — диэн бэлиэтиир Владимир Владимирович.
Ыспыраапка: Крым муостата күҥҥэ 40 тыһыынча тиэхиньикэни аһардар кыахтаах. Икки өттүнэн иккилии массыына ааһар суоллаах, 19 км усталаах. Муоста 2016 с. саҕалаан тутуллубута. Быйыл кыһын ахсынньыга үлэҕэ киириэхтээх этэ. Тутааччылар сыл аҥара эрдэлээн болдьохторун иннинэ бүтэрдилэр. Эһиилги сылга муоста таһаҕаһы таһар, тимир суолунан сылдьар ирээтин олоххо киллэриэхтэрэ. Бырайыак 227,92 млрд солк. сыаналаммыта.
Аграфена КУЗЬМИНА, “Саха сирэ” хаһыат.