«Өксөкүлээх эргимтэтэ» уопсастыбаннай түмсүү салгыы улуустарынан айанныыр. Түмсүү чилиэннэрэ бэҕэһээ Амма улууһун Эмис нэһилиэгэр тахсан үлэлээтилэр.
Алексей Кулаковскай үтүө аатыгар сүгүрүйэр дьон — Күннүк Уурастыырап аатынан оскуола дириэктэрэ Гаврил Захаров уонна үөрэҕирии бэтэрээнэ, ытыктанар учуутал Ольга Михайлова тэрийиилэринэн, Эмистээҕи көрсүһүү көдьүүстээхтик ааста. Саха улуу киһитэ Алексей Кулаковскай духуобунай нэһилиэстибэтин, идеяларын аныгы дьоҥҥо тарҕатыыны дьүүллэстибит, «Кулаковскайдыы олоруу» диэн өйдөбүл тула кэпсэтии таһаардыбыт.
Людмила Реасовна
Манна санаа атастаһан, үлэлииргэ быһаччы этиилэри киллэрдилэр. Нэһилиэнньэ араас араҥата — эдэриттэн кырдьаҕаһыгар диэри, араас идэлээх дьон бары кэлэн бүгүҥҥү духуобунай кыһалҕаларбытын дьүүллэстилэр. Кулаковскайы үөрэтии сүрүн эксперэ — Людмила Реасовна Кулаковская сахалыы сайгыччы этиитин, кини тус санааларын дьон манньыйа иһиттэ. Төһө баҕарар уһуннук олорорго бэлэмнэрэ. Истиинэн эрэ муҥурдаммакка, олохтоох дьон бэйэлэрин олохторун холобуругар тирэнэн, Өксөкүлээхтии олоруу диэн тугун, маны сахаларга барыларыгар тиэрдэргэ тугу гыныахха наадатын этиннилэр.
Эдэрдэр этиннилэр
Киһи үөрүөҕэ, көрсүһүүгэ ыччат дьон — оскуола үрдүкү кылааһын оҕолоро, эдэр исписэлиистэр санааларын хото этиннилэр. Василий Уваров, Виталий Новиков, Данил Тимофеев, Ньургун Тихонов, Роберт Григорьев, Сахаайа Устинова — саастарыгар сөбө суох дьоһуннук, астыктык санааларын үллэһиннилэр.
Учуобунньукка аат иҥэрдилэр
Учуутал Айталина Кириллина, «Эргимтэ» норуоттан мунньубут идиэйэлэрин сааһылыыр, мунньар уонна олоххо киириитин тэрийэр хамыыһыйа наадатын эттэ. Үлэ түмүгүн быһыытынан — учуобунньук тахсыахтаах. Эмистэр аатын кытары толкуйдаатылар: ӨКСӨКҮЛЭЭХ ҮӨРЭҔЭ. Киһи буолан килбэй, саха буолан сандаар!
Кулаковскай тылдьыта
Өксөкүлээх айымньыларыгар билиҥҥи саха ааҕарыгар ыарырҕатар, өйдөөбөт тыллара элбэхтэр. Киэҥ араҥаҕа аахтарарга учуонайдар Өксөкүлээх тылдьытын оҥоруохтарын наада диэн эмистэр сиэрдээх этии киллэрдилэр.
Эмис орто оскуолатын билиитиэкэтин сэбиэдиссэйэ Ульяна Захарова — Кулаковскайы билиҥҥи үөрэх стандартарыгар (ФГОС) сөп түбэһиннэриэн баҕарар. Уруок таһынан үөрэххэ, факультатив быһыытынан Кулаковскайы оҕолорго үөрэтиэххэ. Бырагыраама оҥорон.
Оттон Ольга Михайлова итини өссө салгыы барда: үөрэнээччилэртэн, устудьуоннартан, үлэһиттэртэн Өксөкүлээх сүрүн олуктарын билиигэ сочуот тутуохха наада. Сэбиэскэй саҕана Ленин үөрэҕин билиигэ сочуот киэбинэн. Оччотугар кини үөрэҕэ норуот өйүгэр дириҥник киириэҕэ.
Оттоку олук алгыһа
Эмис оскуолатын оҕолоро “Оттоку олук алгыһа”, “Байанай алгыһа” айымньылары ааҕан иһитиннэрдилэр. Оттон араадьыйа суруналыыһа Нарыйаана Татаринова Эмис нэһилиэгиттэн быһа эфиргэ холбонууну тэрийдэ.
Видео-ролик
Маны таһынан, Саргылаана Неустроева салайааччылаах «Амма ыччатын кырдала» уопсастыбаннай түмсүү быйыл Өксөкүлээх 140 сыл көрсө устубут видео-ролигын астына көрдүбүт. Тумус ыччат манна Кулаковскай ох тылларын ааҕан иһитиннэрдэ. Ролигы устууга көмөлөспүт ыччат уонна дьиэ кэргэн бэлиитикэтигэр миниистири бастакы солбуйааччы Василина Лукина Өксөкүлээҕи үйэтитиигэ эмиэ айымньылаахтык үлэлии сылдьар.
Леонид Спиридонов
«Өксөкүлээх эргимтэтэ» уопсастыбаннай түмсүү биир дуулаҕа боотура, Өксөкүлээх идиэйэлэрин норуокка биир тарҕатааччыбыт Леонид Николаевич Спиридонов буолар. Спортивнай маастарыстыба үрдүкү оскуолатын дириэктэрин солбуйааччы Леонид Николаевич Амма Эмиһигэр тиийэн дьону-сэргэни сонун идиэйэлэринэн сөхтөрдө. Уол оҕону, эдэр спортсмены иитиигэ, саха быһыытынан сандаарыыга олохтоох толкуйун дьон астынна.
Улуустаһыыны утары
Кэпсэтии биир сүрүн тиэмэтинэн, Саха сиригэр улуустаһыыны тохтотуу буолла. Киэҥ Сахабыт сиригэр улуус-улуус менталитета уратылаһарын бэлиэтээтилэр. Бүлүү умнаһа, киин улуустар, илин эҥээрдэр, хотугу, арктическай улуустар олохтоохторо бары — Кулакуоскай тула түмсэн, биир идиэйэнэн, биир учуобунньугунан (ӨКСӨКҮЛЭЭХ ҮӨРЭҔЭ. Киһи буолан килбэй, саха буолан сандаар! ) үөрэннэхтэринэ, Дьокуускайга атааннаһыылар олоччу сүтүөҕэ.
Прокопий БУБЯКИН, www.edersaas.ru, «Өксөкүлээх эргимтэтэ» уопсастыбаннай түмсүү бэрэссэдээтэлэ.[vc_video link=»https://www.youtube.com/watch?v=1yOuZQhNVdY» title=»АЕ Кулаковский»]