«Сахамедиа» холдинг медиа-киинигэр Алексей Кулаковскай-Өксөкүлээх Өлөксөй идеяларын уонна кини духуобунай нэһилиэстибэтин аныгы кэмҥэ норуокка тарҕатар «Өксөкүлээх эргимтэтэ» уопсастыбаннай тэрилтэ сүрэхтэниитэ кулун тутар 15 күнүгэр буолла.
Елена ПОТОЦКАЯ, «Саха сирэ» хаһыат, https://edersaas.ru
Саха улуу бөлүһүөгэ төрөөбүтэ 140 сылын быйыл бэлиэтиибит. Суолталаах тэрээһиҥҥэ уопсастыба араас араҥата — былаас бэрэстэбиитэллэрэ, спорт, бырамыысыланнас, социальнай эйгэ, үөрэх үлэһиттэрэ, суруналыыстар, учуонайдар уонна урбаанньыттар, нэһилиэктэр баһылыктара кытыннылар. Уопсастыбаннай тэрилтэ бэрэссэдээтэлэ Прокопий Бубякин киирии тылыгар бэлиэтээн эппитинэн, сахалар суолдьут сулус буолар киһиэхэ наадыйыылара ордук күүһүрдэ. Өрөспүүбүлүкэ улуустара бука бары билинэр-ытыктыыр, улуустаһыы диэни үрдүнэн турар киһинэн Алексей Кулаковскай буолар. Билигин, аныгы кэмҥэ, кини идеяларын олоххо киллэрэр кэм кэллэ, норуот сомоҕолоһуохтаах.
Өксөкүлээх сиэнэ, уопсастыбаннай тэрилтэ духуобунай лидерэ Людмила Реасовна Кулаковская «кэлиҥҥи кэмҥэ саха улуу дьонун ким хантан төрүттээҕинэн улуустарынан араарыы тахсаары гыммытыттан дьиксинэрин» биллэрдэ. Англияҕа Шекспир, кытайдарга Конфуций буоллаҕына, сахаларга Сомоҕолуур киһибит — Өксөкүлээх Өлөксөй.
Гражданскай уопсастыба института сайдыытын миниистирин бастакы солбуйааччы Савва Михайлов: «Өксөкүлээх Өлөксөй курдук улуу киһибит аатын былаах курдук күөрэччи тутан, инники күөҥҥэ илдьэ иһэрбит наада», — диэн санаатын үллэһиннэ.
«Төгүрүк остуолга» бэрт үгүс кэскиллээх санаа этилиннэ. «Сахамедиа» холдинг генеральнай дириэктэрин солбуйааччы Афанасий Ноев:
— Өксөкүлээх аатынан Норуот академиятын тэрийиэххэ. Нэһилиэк баһылыга норуот сирдьитинэн буолуохтаах. Онон социальнай-экономическай сайдыытынан нэһилиэктэрэ инники күөҥҥэ тахсарын ситиспит баһылыктары Учай алааска илдьэн Өксөкүлээх аатынан бэлиэни туттарар үгэһи киллэриэххэ, — диэн этиитин мунньах кыттыылаахтара дохсун ытыс тыаһынан бигэргэттилэр.
Тыл эппит дьон олох бары хайысхатын таарыйдылар. Ол курдук, интэриниэккэ «ютуб» көрүҥүн киэҥник баһылаан, Сахабыт сирин интеллигенциятын сонун толкуйун, кэскиллээх ситиһиитин киэҥник сырдатыахха, тарҕатыахха, Өксөкүлээх төрөөбүт Учайыгар, кини сэттэ төгүл сылдьыбыт Өймөкөөнүгэр «Өксөкүлээх айаннаабыт суолунан» диэн экспедициялары тэрийии курдук интэриэһинэй этиилэр киирдилэр.
«Өксөкүлээх эргимтэтэ» уопсастыбаннай тэрилтэ сүрэхтэнэн, бүгүҥҥү күнтэн ыла киэҥ хайысхалаах үлэни ыытыаҕа. Манна кыттыбыт араас эйгэ дьоно үлэни быһаччы тэрийсээччи буоларга сөбүлэҥнэрин биэрдилэр.
Елена ПОТОЦКАЯ, «Саха сирэ» хаһыат, https://edersaas.ru