Ахсынньы 9 күнүгэр Дьокуускай куорат Автодорожнай уокуругар Үлэ сылын түмүктүүр тэрээһин буолла.
Ол чэрчитинэн Радиоцентр уонна 68-с кыбаартал икки ардыларыгар баар саҥа уулуссаҕа философскай наука доктора, профессор, академик, суруйааччы, суруналыыс, меценат, биллиилээх уопсастыбаннай деятель, РФ култууратын үтүөлээх үлэһитэ, Ньурба улууһун Ытык киһитэ Ксенофонт Дмитриевич Уткин сырдык аатын иҥэрии сиэрэ-туома ыытылынна.
Тэрээһиҥҥэ Дьокуускай куорат дьаһалтатын уонна Ньурба улууһун бэрэстэбиитэллэрэ, Автодорожнай уокурук олохтоохторо кыттыыны ыллылар.
Ксенофонт Дмитриевич үйэтин тухары үлэни өрө туппута, мэлдьи үлэ үөһүгэр сылдьыбыта, кини көҕүлээн тэрийбит, сайыннарбыт мусуойдара дьоҥҥо-норуокка туһалыы тураллар. Кини үөрэнээччилэрэ өрөспүүбүлүкэни биир гына үлэлии-хамсыы сылдьаллар. Кини ытык сааһыгар тиийэн да олорон, хайдахтаах курдук күүскэ үлэлииринэн, айарынан-суруйарынан, төһөлөөх элбэх кинигэни бэчээттэтэн таһаарарынан кими баҕарар сөхтөрөрө.
Онон, чахчыта да, чуолаан Үлэ сылыгар Ксенофонт Уткин аата Дьокуускай куорат биир уулуссатыгар иҥэриллибитэ дириҥ бэлиэ суолталаах.
Татьяна МАРКОВА, edersaas.ru