«Биһиги, дьиҥэр, ууга барыа суохтаах этибит. Ону, ити өрүс аннынан Мэҥэ-Хаҥаласка гаас ситимин тардыбыттара, онно хас да туонналаах сиэмэнтэни кутаннар, томтор оҥороннор, муус онно кэлэн харар. Гаас турбата эбэ саамай кыараҕас, синньигэс сиринэн ааһар. Ону алдьатымаары, мууһу дэлби тэптэрбэккэ нэһилиэк аҥаара ууга барда. Урут кэмигэр буомбалаан, халаан этэҥҥэ ааһааччы. Быйыл дьаһалта үлэһиттэрэ, устудьуоннар даамбаны бөҕөргөтөргө күнүстэри-түүннэри үлэлии сатаатылар да, айылҕа күүһүн утары турар кыах суох», — диэн кэпсииллэр олохтоохтор.
edersaas.ru
«Мууһу хараардыы үлэтэ туох да туһата суох, сымыйа. Бульдозерынан өрүс хаарын ыраастаан кэбиһэллэр, эрбэтэллэр, онтулара төттөрүтүн мууһу кытаатыннаран биэрэр. Халлаан хаста да ириэрэр-тоҥорор, ол кэмҥэ эрбэммит муус хам сыстан өссө халыҥаан биэрэр. Сыбааркаламмыт курдук бэйэ-бэйэтин кытта сыстыһан хаалар.
Быйыл муус халыҥа суох, саамай улахана 1 м. 80 см., балыксыттар биирдэ дьөлөбүт дииллэр.
Өссө Табаҕа диэкинэн өрүс уҥуор тимир суол муостатын тутаары бырайыак оҥорбуттар диэн кэпсииллэр. Оччоҕо бу диэки павловскайдар, хоточчулар, ороссолуодалар, өктөмнөр бары олоччу ууга барабыт. Муоста сыбаайата турда да мууспут эмиэ кыайан барыа суоҕа. Гаас турбатын, муостаны харыстаан эмиэ мууһу дэлби тэптэрбэккэ олоруохтара», — диэн ууга барбыт дьиэтин харабыллаан олорор кырдьаҕас санаатын этэр. Тохтуу түһэн баран: «Мин кэпсээбиппин барытын таһаарыахтара дуо? Аҥаарын быһан кэбиһиэхтэрэ суоҕа дуо?» — диэн сэрэхэдийэр.
Тоҕо эвакуационнай пууҥҥа барбатын ыйыппыппар: «Дьиэбин хайдах хаалларыахпыный. Хаһаайыстыбабын ким көрүөй», — диэн этэр.
Ити курдук Өктөм уулуссатынан устан истэхпитинэ, мотуор тыаһын истэн, аҥаара ууга тимирэн турар дьиэттэн хаһаайын өҥөс гынар. Манна үксэ кырдьаҕастар эрэ хаалбыттар.
Хабаровскайтан, Новосибирскайтан көмөҕө кэлбит ЫБММ уолаттара дөрүн-дөрүн ким хаалбытын, туох куттал баарын мотуорунан кэрийэ сылдьан көрөллөр-истэллэр.
Марианна Тыртыкова, «Саха сирэ», edersaas.ru