Тыа хаһаайыстыбатын академиятын Өктөмнөөҕү филиала ааспыт сылтан ыла агрооскуолалары кытта үлэтин күүһүртэ.
Елена ПОТОЦКАЯ “Саха сирэ”, edersaas.ru
— Оҕо үөрэххэ киириитин ырытан көрбүппүтүгэр, өрөспүүбүлүкэҕэ 96 агрооскуола баар буоллаҕына, быйылгы үөрэх дьылыгар биһиги үөрэхпит кыһатыгар 48 эрэ оҕо киирбит. Бу олох кыра көрдөрүү. Онон сотору кэминэн Ил Дархан уурааҕа тахсыахтаах. Агрооскуола үлэтин көдьүүһүн үрдэтэр туһунан. Оскуола аайы агроучаастактардаахтар, ол онно науканы кытта ыкса сибээстээх үлэ барыахтаах. Бу үлэни ордук биһиги сүрүннүөхпүт.
Биллэн турар, ыччаты үөрэхпит кыһатыгар тардыахпытын баҕарар буоллахпытына, бэйэбит материальнай базабытын хаҥатыахпытын наада. Ханнык баҕарар төрөппүт үөрэҕэр кыахтаах оҕотун сайдыылаах, анал базалаах үөрэх кыһатыгар үөрэттэриэн баҕарара чуолкай. Онон агрономнары үөрэтэргэ биһиэхэ анаммыт бааһынабытын оҥостуохпут. Ол инниттэн тыа хаһаайыстыбатын академиятын салалтата анал тиэхиньикэ ылан биэрдэ. Ону таһынан оробуочай бөлөх тэриллэн, 2021 сылга диэри биэс сыллаах тыа хаһаайыстыбатын академиятын сайдыытыгар сыһыаннаах суолталаах анал тосхолу оҥордубут. Ол онно ыччат үөрэххэ киириитин ахсаанын лаппа үрдэтэр соругу туруордубут, — диэн санаатын үллэстэр Саха государственнай тыа хаһаайыстыбатын академиятын Өктөмнөөҕү филиалын дириэктэрин эбээһинэһин толорооччу Марианна Петрова.
Бүгүҥҥү күҥҥэ Өктөм филиалыгар 500 устудьуон үөрэнэр. Биэс сылынан бу үөрэх кыһатыгар үөрэнэр оҕо ахсаана 1600 буолуохтаах. Бу, биллэн турар, наһаа улахан үлэттэн тахсар сорук. Ол эрээри үлэтигэр эппиэтинэстээх, ирдэбиллээх эдэр салайааччы саҕалаабытын өссө тупсарарыгар киһи эрэнэр.
Елена ПОТОЦКАЯ, edersaas.ru