Саха сиринээҕи култуура уонна ускуустуба коллеһа тэриллибитэ 80 сылын бэлиэтиир үөрүүлээх тэрээһинэ Суорун Омоллоон аатынан Опера уонна балет тыйаатырыгар буолла. Бу долгутуулаах дьоро киэһэҕэ алтыһыннаран, үгэс буолбут “Күн Өркөн” бириэмийэни туттарыы дохсун ытыс тыаһынан арыалланна.
Сардаана БАСНАЕВА,“Саха сирэ” хаһыат, edersaas.ru
Киэҥ уораҕай түһүлгэтигэр култуура училищетыгар, колледжка араас сылларга үөрэммит, үлэлээбит дьон, педагог-бэтэрээннэр, култуура эйгэтин үлэһиттэрэ өрөспүүбүлүкэ бары улуустарыттан үөрүүнү үксэтиһэ, тапталлаах кыһаларыгар эҕэрдэлэрин тиэрдэ, көрсүһэн эдэр саастарын санатыһа, ахтылҕаннарын таһаара муһуннулар.
Саалаҕа толору мустубут ыалдьыттарга туһаайан Ил Түмэн спикерэ Александр Жирков култуура уонна ускуустуба коллеһа Сахабыт сиригэр култуура эйгэтин үлэтэ сайдарыгар сүҥкэн кылааты киллэрсэрин бэлиэтээтэ. Идэлэрин баһылаабыт ыччаттар дириҥ билиилэринэн-көрүүлэринэн, айымньылаах, үрдүк таһаарыылаах үлэлэринэн, ураты дьоҕурдарынан дьон-сэргэ болҕомтотун тардалларын, сэҥээриини, хайҕалы ылалларын эттэ.
—«Күн Өркөн» бириэмийэ култуура эйгэтигэр үлэлии-хамсыы, сыраларын уура сылдьар дьон үлэтин көҕүлүүр, өйүүр, сырдатар соруктаах туттарыллар. Бу бириэмийэ 2013 сылга олохтоммута. Сыллата кыттааччы элбээн иһэр. Улуустартан, нэһилиэк баһылыктарыттан, уопсастыбаннай түмсүүлэртэн быйыл да элбэх ходатайство киллэриллибитэ. Манна биһиги үөрэхпит кыһатын анал хамыыһыйата болҕомтолоохтук үлэлээтэ. Түмүккэ, хамыыһыйа быһаарыытынан, сыанабылынан хайысхаларынан лауреаттар ааттаннылар. Тэрээһиммитин сыл ахсын сонун, сэргэх оҥорор туһугар кыһаллабыт. Холобур, быйыл Ыччат сыла буоларынан, бэйэбит устудьуоннарбыт сыл устата туруорбут бастыҥ ньүөмэрдэрин, урукку үҥкүүлэри саҥалыы көрүүнэн сөргүтэн, туруоран үбүлүөйдээх киэһэбитигэр анаан көрдөрдүлэр. Бу киэһэбитин дьон-сэргэ сөбүлээтэ, махтанна, — диэтэ колледж дириэктэрэ Захар Никитин.
Биһирэмнээх бириэмийэни аан бастаан бастыҥ үөрэхтээх, колледж олоҕор көхтөөхтүк кыттар, быйылгы сылга ситиһиилээх устудьуоннарга туттарыыттан саҕалаатылар. Манна «Күн Өркөн эрэлэ» бириэмийэ лауреаттарынан төрдүс кууруска үөрэнэр ыччаттар талыллан, бу киэһэ күннээтилэр. Сахаайа Каратаева («Этнохудожественнай айымньы»), үҥкүү салаатыгар үөрэнэр Елизавета Никулина, Константин Седалищев («Фотовидеотворчество»), Майя Лукманова уонна Дмитрий Титов (тыйаатырга көрдөрүүлэри, култуурунай-маассабай тэрээһиннэри тэрийээччи, туруорааччы идэтигэр үөрэнэллэр) үөрэн-көтөн өрөгөйдөөтүлэр.
Салгыы дохсун ытыс тыаһыгар доҕуһуоллатан быйыл үлэлэригэр уһулуччу ситиһиилэммиттэргэ, сонун, саҥа сүүрээни киллэрэн улахан болҕомтону тардыбыттарга туттардылар.
КЫАЙЫЫЛААХТАР:
- «Идэҕэ бэриниилээх буолуу» номинацияҕа «Күн Өркөн» лауреатынан быйыл Гаврил Софронов буолла. Гаврил Григорьевич 1969 сылтан 1979 сылга диэри культпросвет училище дириэктэринэн үрдүк таһаарыылаахтык үлэлээбит. СӨ култуура үтүөлээх үлэһитэ.
- «Этнохудожественнай айымньы» диэн хайысхаҕа «Күн Өркөн» лауреатынан Саргылана Григорьева ааттанна. Саргылана Васильевна Хатаска искусство оскуолатыгар фольклор кылааһын салайар. Култуура коллеһын 1993 сыллаахха бүтэрбит. СӨ култуура туйгуна.
- «Хор дирижера» хайысхаҕа Владимир Васильев лауреат үрдүк аатын ылла. Кини Бүлүүгэ бэтэрээннэр хордарын салайар, СӨ култуура үтүөлээх үлэһитэ, культпросвет училищены 1978 с.бүтэрбит.
- Бибилэтиэкэ үлэһиттэригэр быйылгы сыл лауреатынан СӨ Национальнай бибилэтиэкэтиттэн Татьяна Павлова буолла. Татьяна Петровна СӨ култуура үтүөлээх үлэһитэ.
- Үҥкүү эйгэтигэр лауреат үрдүк аатын С.Зверев-Кыыл Уола аатынан үҥкүү национальнай тыйаатырын солистара Афанасий уонна Зоя Соловьевтар ыллылар. Афанасий Афанасьевич РФ үтүөлээх артыыһа, Зоя Михайловна СӨ үтүөлээх артыыһа.
- Сунтаартан искусство оскуолатыгар тыас-уус операторынан үлэлиир, гитара кылааһын педагога Альберт Горохов «Музыкальное звукооператорское мастерство» диэн хайысхаҕа лауреат буолла.
- СӨ эстрада Судаарыстыбаннай тыйаатырын солиһа, СӨ култуура туйгуна Василий Ермеев «Музыкальное искусство эстрады» хайысхаҕа лауреат аатын ылла.
- «Режиссура» хайысхатыгар Зоя Аржакова ааттанна. Кини 1979 сылтан 2008 сылга диэри Чапаевтааҕы (Хаҥалас) култуура дьиэтин дириэктэринэн, норуот тыйаатырыгар режиссерунан үлэлээбит. Культпросвет училищены 1978 с. бүтэрбит.
- «Телевидеотворчество» хайысхаҕа лауреат үрдүк аата Александра Охлопковаҕа туттарылынна. Александра Лазаревна «САХА» НКИХ үлэлиир.
- Амма улууһун Алтаннааҕы норуот тыйаатырын режиссера Валерий Лобанов тыйаатырга ситиһиилээх, үрдүк таһаарыылаах үлэтинэн лауреат буолла.
Бу киэһэ бары ыалдьыттарга анаан ыллам ырыа ылланна, үҥкүү-битии үлүскэннээҕэ, оонньуу-көр бэртээхэйэ, хоһоон хомоҕойо тардылынна. Көрсүспүт көлүөнэлэр дьоро киэһэҕэ тэҥҥэ ыллаһан, ытыстарын тыаһын харыстаабакка таһынан, кэлин кинилэри солбуйуохтаах ыччаты хайгыы, сөҕө олордулар. Түмүккэ өйдүү-саныы сылдьарга хаартыскаҕа түстүлэр. Үөрэммит кыһалара аал луук мастыы лабаата лаглайан, силиһэ чиҥээн иһэригэр баҕардылар.
Сардаана БАСНАЕВА, “Саха сирэ” хаһыат, edersaas.ru