Пушкин аатынан Национальнай бибилэтиэкэ Историческай саалатыгар, бэс ыйын 19 күнүгэр, СӨ Култуура уонна ускуустуба эйгэтигэр үлэлиир дьон айар сойууһа иккис сылын «Грани культуры» бириэмийэлэри туттарда.
Үөрүүлээх тэрээһини СӨ Култуура уонна ускуустуба эйгэтигэр үлэлиир дьон айар сойуустарын бэрэссэдээтэлэ Захар Никитин арыйда. Кини кэнниттэн музыкальнай кириитик Владимир Индигирскэй үлэҕэ үүнүүнү уонна сайдыыны баҕарда, эҕэрдэтин тиэртэ. Салгыы Суорун Омоллоон аатынан Опера уонна балет тыйаатырын артыыстара киһини абылыыр, сааланы толору баһылыыр күүстээх куоластарынан ырыа ыллаан ыҥырыылаах ыалдьыттарга бэлэх ууннулар.
Тэрээһин күүтүүлээх, үөрүүлээх чааһа саҕаланна. Дохсун ытыс тыаһа доҕуһуолунан 12 бириэмийэ туттарылынна. Ол курдук, сыл аайы ыытыллар биһирэбил кыайыылаахтарынан буоллулар:
«Бастыҥ норуодунай бөлөх» – «Дружба» оҕо норуодунай ансаамбыла (салайааччы Валентин Козлов);
«Омук дойдутуттан кэлбит бастыҥ гастроль» – «The fire of Georgia» үҥкүү бырайыага (тэрийээччи Василий Кривошапкин);
«Бастыҥ бэстибээл» – «Зима начинается с Якутии» норуоттар икки ардыларынааҕы бэстибээл;
«Бастыҥ иэйии» – балет артыыһа Венера Федотова;
«Мусуой бастыҥ үлэһитэ» – Ярославскай аатынан хотугулуу норуоттар историяларын уонна култуураларын холбоһуктаах мусуой историческай салаатын салайааччыта Семен Окоемов;
«Бастыҥ ыччат бырайыага» – «Snow Voice» бөлөх;
«Бастыҥ киинэ продюсера» – «Берлинале» киинэ аан дойдутааҕы бэстибээлигэр көрдөрүллүбүт «Ага» продюсера Сардаана Саввина;
«Бастыҥ соло кэнсиэр» – Олимпия «Атын сүрэх» кэнсиэрэ;
«Айар куттаах киһи» – СӨ үтүөлээх артыыһа, Пушкин аатынан Нуучча драматическай тыйаатырын артыыһа Степан Федоренко;
«Сыл бастыҥ тэрээһинэ» – Александринскай тыйаатыр гастрола (тэрийээччи П.А. Ойуунускай аатынан Саха академическай тыйаатыр);
«Сыл бастыҥ саҕалааһына» – СӨ култууратын туйгуна, киинэ режиссера Эдуард Новиков.
Күрэс бастыҥ кыайыылааҕынан, «Норуот билиниитэ» аат, «Кыталык» РФ үтүөлээх, СӨ норуодунай үҥкүү кэлэктиибин салайааччытыгар Василий Винокуровка иҥэрилиннэ.
Захар Никитин, СӨ Култуура уонна ускуустуба эйгэтигэр үлэлиир дьон айар сойуустарын бэрэссэдээтэлэ:
— Бу тэрээһиммит быйыл иккис сылын ыытыллар. Урут икки эбэтэр биэс сылга биирдэ оҥорор былааннаах буоллахпытына, толкуйдаан баран, сыл аайы ыытарбыт ордугун өйдөөбүппүт. Култуура эйгэтигэр үлэлиир дьон үгүс, кинилэргэ болҕомто хайаан да наада. Ону сэргэ, өссө дьон сынньалаҥын тупсарыыга үлэлэһэр урбаанньыттары эмиэ өйүүбүт. Кинилэргэ наҕараадалар көрүллүөхтээхтэр. Ол иһин, бириэмийэбит салгыы сайдан, статуһа үрдээн, инникилээх буолуо диэн эрэнэбит.
Бириэмийэ кэлэр сылларга улаатан, тэнийэн, ордук киэҥ сиргэ, үрдүк сыанаттан, үгүс дьону ыҥыран тэрээһин ыытыллара олус наада. Хас биирдии киһи үлэтэ таһаарыылаах буоларыгар, кырдьык, биһирэбил баара булгуччулаах. Быйылгы кыайыылаах дьон эппиттэрин курдук: «Дьон ытыһын тыаһа уонна махтала айар-тутар киһиэхэ күүтүүлээх, ону кытта бииргэ үлэлиир дьонуҥ биһирэбиллэрэ эмиэ олус күндү».
Светлана ИВАНОВА, «Саха Сирэ» хаһыат, edersaas.ru