Интернет үйэтэ кэлэн, Саха сирин араас муннуктарыттан эгэлгэ сонуннар киирэ тураллара олохпутун киэркэтэр.
Холобур, Ньурба улууһун Маар бөһүөлэгин “Алгыс” эбээлэр түмсүүлэрэ, салайааччы Валентина Егорова, нэһилиэк социальнай үлэһитэ Елена Петрова уонна нэһилиэк Кырдьаҕастарын Сүбэтин бэрэссэдээтэлэ Ирина Васильева көҕүлээһиннэринэн, нэһилиэк ытык кырдьаҕастарын, инбэлииттэри, дьиэлэригэр тиийэн, үүммүт Саҥа 2018 сылынан эҕэрдэлээн, үөртүлэр.
— Таҥас мөһөөччүктэри тигэн, былыргы аккырыыккаларынан киэргэтэн, сахалыы ас-үөл – үүт-сүөгэй, көбүөр, күөрчэх, собо, ынах иһин нобуора, хаан, куобаҕар тиийэ илдьэн туттартаан, кырдьаҕастарбыт барахсаттарга соһуччу үөрүү буолла, — диир Валентина Васильевна.
Чахчы даҕаны, Моруос Оҕонньордоох, Хаарчааналаах, сыарҕанан-салаасканан соһо сылдьан ыалларга тиийэн, ырыа-тойук, үҥкүү кэһиилээх, маннык мааны бэлэхтэри оҥоруу – бу сонун көстүү. Биир дойдулаахтара үөрүөхтэрин үөрэллэр, махтаныахтарын махтаналлар.
“Алгыс” эбээлэр түмсүүлэрэ маннык үтүө дьыалаларын өссө салгыыр былааннаахтар. Холобур, аны саас ыам ыйыгар Улуу Кыайыы күнүгэр, нэһилиэктэригэр, эмиэ ырыа-тойук уонна сахалыы – кыбытыылаах тигии, оҕуруолаах, быысыбайдаах иис, сыттык, олбох, онтон да атын уус-уран оҥоһук кэһиилээх тиийэн, тыыл бэтэрээннэрин эҕэрдэлиэхтэрэ.
Ити курдук, маардар — ыраах тыа сирин олохтоохторо, киһиэхэ ураты истиҥ сыһыан, болҕомто үтүө холобурун көрдөрөллөр, олохторун бэйэлэрэ киэргэтэллэр, интэриэһинэй, баай ис хоһооннууллар.
Татьяна МАРКОВА, «Саха сирэ» хаһыат, edersaas.ru