Хайа баҕарар нэһилиэккэ сэмээр сылдьан үтүөнү оҥоро, бултаабыт булдуттан бэрсэ, бөҕү-сыыһы ыраастыы сылдьар дьон баар буолаллар. Кэбээйи улууһун Куокуй сэлиэнньэтин олохтооҕо Геннадий Иванов оннук киһи.
Сарсыарда эрдэ туран хотонун, илимин көрөр, онтон кыра дьиэтигэр хаартыска бэчээттиир, «Күннүгүн» сурунар, аймахтарын, билэр дьонун төрүччүтүн оҥорор. Былырыын күһүн Сибэкки скверигэр 15 сардаана сибэкки араскытын аҕалан үүннэрбитэ быйыл үксэ быган эрэр. Манна Геннадий Васильевич күн өрүү-өрүү сквери хомуйар, үрэхтэн уу баһан таһааран сардааналарыгар кутар, ол-бу бөҕү-саҕы бырахпыттарын хомуйар. Сиргэ-уокка сылдьан эмиэ куруук ыраастыы, хомуйа сылдьар идэлээх. Онон, кинини «Биһиги волонтербут» диэн ааттыахпытын ааттыыбыт.
Иллээх дьиэ кэргэн аҕа баһылыга, элбэх сиэн эһэтэ Геннадий Васильевич быйыл саас 70 сааһын туолла. Хоһоонньут, кыраайы үөрэтээччи, ырыаһыт, топонимист, фотограф аатыгар аны волонтер аата эбилиннэ.
Куокуйтан Варвара СПИРИДОНОВА, «Саха сирэ» хаһыат, edersaas.ru сайтка анаан