Дьокуускай куорат дьаһалтата тыа хаһаайыстыбатын сайыннарыыга улахан болҕомтотун уурар, тус сыаллаах бырагырааманан үлэлиир.
Ол түмүгэр хаһаайыстыбалар бигэтийии суолугар киирдилэр, сылгы ахсаана эбиллэн, бары салааларынан бородууксуйаны ылыы көрдөрүүтэ үүнэн иһэр. Быраҕыллан сыппыт урукку сопхуостар бааһыналарын туһаҕа таһааран, муниципальнай хаһаайыстыбалар бурдугу үүннэриини 5,5 төгүл, оҕуруот аһын олордууну 30 %, хортуоппуйу үүннэриини 50 % улаатыннардылар, сымыыты, эти оҥоруу көрдөрүүлэрин биллэрдик тупсардылар. Бородууксуйаны куорат тэрилтэлэригэр батарыыга улахан үлэ ыытылынна. Соторутааҕыта куорат баһылыга Айсен Николаев АПК тэрилтэлэрин эдэр исписэлиистэрин кытары көрүстэ.
Татьяна Ермолаева, «Дьокуускайдааҕы көтөр фабриката» ААУо тэрийэр-хонтуруоллуур салаатын салайааччы:
– Куоракка уонна куорат таһынааҕы бөһүөлэктэргэ тыа хаһаайыстыбатын эйгэтигэр үлэлиир исписэлиистэр 47 %-нара эдэр дьоннор. Кинилэри түмэр, социальнай боппуруостары кииннээн быһаарар, тус сыаллаах бырагыраамаларга кыттар итиэннэ идэни үрдэтэр сыалтан куорат АПК-тын эдэр исписэлиистэрин Ассоциациятын тэриннибит. Күн бүгүн бу түмсүүгэ 73 киһи киирдэ. Куорат баһылыга Айсен Николаевы кытары көрсүһүү бэрт истиҥник, сэргэхтик барда. Айсен Сергеевич Ассоциация тэриллибитин биһирээтэ, ситиһиилэри баҕарда, үлэни-хамнаһы салгыы сайыннарарга саҥа сыһыан, ол эбэтэр инновационнай технологиялары киллэрии наадатын, эдэр дьонтон сонун санаалары, идиэйэлэри күүтэрин эттэ. Куорат салалтата үлэһит дьону мэлдьи өйүү туруоҕа диэтэ.
Раиса СИБИРЯКОВА, “Саха сирэ” хаһыат, edersaas.ru