Куорат тайахчыттара, электроннай сурутууга бэлэмнэниҥ!

Бөлөххө киир:

Быйыл ыыраахтаах туйахтаах кыыллары бултуурга көҥүл Дьокуускай куоракка электроннай сурутуунан эрэ бэриллэрин туһунан иһитиннэриилэр эрдэ тахсан тураллар. Сурутуу http://e-yakutia.ru судаарыстыбаннай уонна муниципальнай өҥө порталын нөҥүө от ыйын 27 күнүгэр киэһэ 6 чаастан саҕаланыаҕа.

Электроннай көрүҥүнэн сайабылыанньа биэрэргэ судаарыстыба өҥөтүн биир кэлим судаарыстыбаннай порталыгар  (www.gosuslugi.ru) учуокка суруллубутуҥ    бигэргэммит буолуохтаах. Порталга регистрацияланан баран, өскөтүн дьиэҕэр ПК суох эбэтэр сибээс мөлтөх буоллаҕына, Дьокуускай куораты хааччыйар 39 киинтэн биирдэстэригэр тиийэҕин. Кииннэр испииһэктэрин уонна үлэлэрин эрэсиимин https://esia.gosuslugi.ru/public/ra/ киирэн билсиэххэ сөп.

Үөһэ ыйыллыбытын курдук, сайаапкалаах киһи учуокка суруллубута бигэргэммитин кэнниттэн www.e-yakutia.ru судаарыстыба өҥөтүн өрөспүүбүлүкэтээҕи порталын тус кабинетыгар киирэн, маннык дьайыылары оҥорор:

  1. Сүрүн страницаҕа “Запись на прием ведомство” сервиһи талар;
  2. “Ведомство” графаҕа аадырыһы талар;
  3. “Услуга” графаҕа көһөн, “Выдача разрешений на добычу охотничьих ресурсов” эбэтэр “Выдача разрешений на добычу охотничьих ресурсов (ООПТ)” талар;
  4. “Дата/Время” графаҕа көһөн, күнүн (01.08.2018 эбэтэр онтон кэлэр күннэри) уонна кэмин (бэйэтигэр табыгастаах бириэмэни) ыйар. Өскөтүн, порталга ыйбыт күнэ, бириэмэтэ суоҕун туһунан иһитиннэрии таҕыстаҕына, атын күнү, бириэмэни талар;
  5. “Подтверждение записи” графаҕа көһөн, бэрэбиэркэлиир уонна бигэргэтэр;
  6. Бары дьайыыны оҥорбутун кэнниттэн персональнай ПИН-код бэриллэр, онтон уочаракка суруллар.

Сайаапкалаах киһи болдьоммут кэмигэр ылбыт ПИН-кодун илдьэ Курашов аатынан уулусса 30/1 №-дээх дьиэтигэр 3-с этээскэ тиийэр. Хойутаатаҕына эбэтэр кэлбэтэҕинэ, уочарата атын кэмҥэ көһөрүллүбэт, көтүтүллэн хаалар. Электроннай сурутуу уочаратынан сайаапкалары ылыы уонна көҥүлү биэрии атырдьах ыйын 1 күнүгэр сарсыарда 9 чаастан саҕаланар. Тэрийээччилэр этэллэринэн, ити күнтэн саҕалаан киирэр ааҥҥа терминал үлэлиэҕэ, онон электроннай сурутуу уочаратын сэргэ терминалынан кытта толуон ылан уочараттыахха сөп буолуо. Хас 10-нуу мүнүүтэҕэ 4-түү киһиттэн сайаапкаларын ылыахтара. Сайаапкалаах киһи ханна, тугу бултуон баҕарар сиригэр лицензия баар (ордубут) буоллаҕына, Сберкассаҕа квитанциялаах тиийэн түһээнин төлүүр итиэннэ Экология, айылҕаны туһаныы уонна ойуур хаһаайыстыбатын (уруккунан Айылҕа харыстабылын) министиэристибэтин булт ресурсаларын сүрүннээһиҥҥэ, туһаныыга уонна харыстааһыҥҥа управлениетын исписэлиистэригэр кэлэн, бултууругар көҥүл ылар докумуонун толорторор. Сайаапкалаах киһи биир эрэ лицензияны ылар бырааптаах.

Манна сыһыаран эттэххэ, ити ааттаммыт министиэристибэ салайааччылара, исписэлиистэрэ Инновация, сыыппара сайдыытын уонна инфокоммуникация технологиятын (уруккута Сибээс уонна информация технологиятын) министиэристибэтин кытта “электроннай уочараты” киллэриигэ ыкса үлэлэһэн, уонча төгүл боруобалаан-холоон  көрүүнү ыыттылар. Сарсын, от ыйын 19 күнүгэр, биир кэмҥэ 1 тыһ. кэриҥэ булчуту электроннай сурутууга кытыннаран, саҥа ньыма тугун-ханныгын тургутан көрүөхтэрэ.

Василий НИКИФОРОВ, «Саха сирэ» хаhыат, edersaas.ru

+1
0
+1
0
+1
0
+1
0
+1
0
+1
0
+1
0