Бэркэ убаастыыр киһим Любовь Аргунова саҥа тахсыбыт “Оҕо сааһы одуулуубун” кинигэтигэр маннык суруйбут:
“Олохпут усулуобуйатын оҥостууга туох баар үтүө кэммит, күүспүт-күдэхпит ананар. Сааһырыахпытыгар диэри сиир килиэппититтэн, олорор дьиэбититтэн, таҥнар таҥаспытыттан ордук интэриэспит ырааппакка хаалар. Итинтэн саҕаланар: билиҥҥи олохтон саллыыбыт, майгы-сигили өттүнэн айгырааһыммыт, тугу барытын харчы хараҕынан көрүүбүт. Бу барыта олохпут сатарыйыытын биир төрүөтүнэн буолла дии саныыбын”.
Бу кэрчиги ааҕан баран, үгүс кырдьаҕаһы долгутар (ол эрээри, саха киһитин сиэринэн, мээнэ таска таһааран саҥарбат) кыһалҕаны санаан ылабын. Любовь Семеновна этэрин курдук, сиир килиэби булууттан атыны толкуйдаабатах дьон билигин, сааһыран баран дьэ, нус-хас бэйэлэрин интэриэстэринэн, көҥүллүк тыынан, кыраһыабайдык кырдьар курдук олоруохтарын баҕараллар. Ол гынан баран, үксүгэр, көрөрбүт курдук, бу кырдьаҕастарбыт барахсаттар аны куоракка киирэн, сиэннэрин уһуйааннарга, оскуолаҕа, араас дьарыктарга таһаллар, салгын тиийбэт таас дьиэтиттэн уонна сиэннэрин илдьэр тэрилтэлэриттэн атыны билбэттэр. Сорохтор дьиҥэр, бэйэлэрин да харайтарыах көрүҥнээхтэр ээ. Куоракка киирэн тэһийбэккэ, төрөөбүт алаастарын ахтан орто дойду олоҕуттан кэмин иннинэ туораабыт дьон да аҕыйаҕасуох. Итинтэн сиэттэрэн, бэйэ иитиллэн-хараллан баран, аны кырдьаҕастарбыт кыраһыабайдык, доруобайдык кырдьалларыгар сөптөөх усулуобуйаны оҥорорго, иитиллибит иэһи толуйарга хаһан үөрэнэрбит буолла? Киһи хомойуох, “Миигин төрөппүтүҥ, онон тиһэҕэр диэри мин олохпунан олоруохтааххын…” диир бардам ыччаттар эмиэ көстөллөр. Оттон, ити эмиэ киһини толкуйдатар атын кыһалҕа…
Надежда ЕГОРОВА, «Саха сирэ» хаһыат, edersaas.ru