Дьокуускайга ураты тыыннаах күрэс буолла

Ааптар: 
Бөлөххө киир:

Ааспыт субуотаҕа, бэс ыйын 2 күнүгэр, “Туймаада” стадиоҥҥа өтөр-наар буолбатах ураты тэрээһин буолла. Быйылгы дьыл сүрүн күрэхтэһиитигэр — Арассыыйаҕа маҥнайгытын ыытыллар футболга аан дойду чөмпүйэнээтигэр — барааччылартан (билиҥҥитэ көрөөччү эрэ быһыытынан) хомуллубут хамаандалар икки ардыларыгар футболга турнир тэрилиннэ.

Күрэхтэһии үөрүүлээх аһыллыытыгар Спорт министиэристибэтин физическэй култуураҕа, маассаба спорка управлениетын салайааччы Николай Цыпандин бу тэрээһин сүрүн сыалынан аан дойду чөмпүйэнээтигэр барар биир дойдулаахтарбытын бэйэ-бэйэлэрин кытта билсиһиннэрии, түмүү буолар диэн бэлиэтээтэ, спорт улахан бырааһынньыгар эйэ дэмнээхтик, бэйэ-бэйэлэрин өйөнсөн-көмөлөсүһэн сылдьалларыгар, Сахаларын сирин былааҕын үрдүктүк туталларыгар ыҥырда.

Киин куорат футболга сойууһун сэбиэтин бэрэссэдээтэлэ Алексей Адамов өрөспүүбүлүкэттэн быйылгы мундиалга хас да тыһыынча киһи барарга бэлэмнэнэрин, бүгүҥҥү күрэскэ сүрүннээн куорат лигатын хамаандаларын оонньооччуларын сэргэ биирдиилээн футболу сэргээччилэр, барыта 23 киһи кэлбитин эттэ.

Ол иһин да буолуо, бу күрэс кыттыылаахтара сымнаҕас дьыбааҥҥа тиэрэ түһэн сытан пиибэ иһэ-иһэ тэлэбиисэри өрө мыҥыыр футбол фанаттара дэнээччилэртэн быһыылыын-таһаалыын, бэл сирэйдиин-харахтыын туспа дьон буолан биэрдилэр. Оттон сатаан футболлуулларын туһунан этэ да барыллыбат — күөх хонууга киһи үөйбэтэх араас албастарын улахан маастардартан хаалсыбаттык оҥоротоон субуота сарсыарда стадиону өҥөйбүт ахсааннаах көрөөччү биһирэбилин ыллылар.

Сүүрбэлии мүнүүтэлээх икки түһүмэх түмүгүнэн “Сочи” хамаанда 4:2 ахсаанынан кыайыылаах таҕыста.

Футбол Саха сиригэр спорт биир саамай маассабай көрүҥүнэн буолар. Аҥардас Дьокуускай куорат улахан дьоҥҥо чөмпүйэнээтэ, бэтэрээннэри киллэрэн туран, биэс лиганан ыытыллар. Онно балтараа сүүс хамаанда кыттар. Сыллата отуттан тахса араас таһымнаах күрэхтэһиилэр ыытыллаллар.

Мундиаль тыынынан илгийбит күрэс кыттыылаахтара табаарыстыы көрсүһүүттэн улахан дуоһуйууну ыллылар. Сонун тэрээһин кыайыылаахтара киин куорат футболга сойууһа туруорбут анал кубогынан бэлиэтэннилэр, оттон мээчиги тэппит эрэ барыта өйдөбүнньүк мэтээллэринэн наҕараадаланнылар.

Кыттааччы санаата

Василий Кривошапкин, футболу сэргээччи:

—Футболга аан дойду чөмпүйэнээтин курдук спорт улахан бырааһынньыга Арассыыйаҕа ыытылларыттан олуһун диэн үөрэбин. Мин от ыйын 14-гэр Санкт-Петербург куоракка буолар үһүс миэстэ иһин көрсүһүүгэ билиэттээхпин. Ону атыылаһыыга, ыалдьааччы пааспарын ылыыга улахан кыһалҕаны көрсүбэтэҕим.

Бастаан от ыйын 5 күнүгэр Сочи куоракка барар былааннаахпын, онно финал чиэппэринээҕи көрсүһүүнү көрбүт киһи диэн санаалаахпын. Салгыы 11 чыыһылаҕа Москваҕа тиийиэм, эмиэ билиэтим суох эрээри, биир эмэ оонньууга сылдьыбыт киһи диэн баҕалаахпын.

Бэйэм 2001 сыллаахтан футболунан умсугуйабын. Англия хамаандатын иһин ыалдьабын. Кулууптартан Manchester United өрө тутабын. Биллэн турар, бу мундиалга Арассыыйа хамаандатын күүһүм-күөмэйим тиийэринэн өйөөн көрүөм. Хайдах буолар…

Роман Попов

Ааптар хаартыскаҕа түһэриитэ.

+1
0
+1
0
+1
0
+1
0
+1
0
+1
0
+1
0