Бүгүн социальнай ситимнэргэ аны кытай туриһа бэлэсипиэтинэн Өймөкөөҥҥө айаннаан иһэрин туһунан иһитиннэрии тилийэ көттө.
Елена Потоцкая, «Саха сирэ» хаһыат, www.edersaas.ru
Өймөкөөн улууһун олохтоохторо бу сураҕы ким эрэ уустаан-ураннаан оҥорон кэпсээбитин курдук ылынар. Томпо Тополинайыттан биир да нэһилиэнньэлээх пууна суох кураанах “Халыма” федеральнай трассатынан адаар таас хайалары уҥуордаан айаныылларыгар, массыынаналара алдьаммакка-кээһэммэккэ тиийэригэр Таҥараттан көрдөһөн, сэрэхтээхтик сылдьар дьон итэҕэйбэттэрэ эмиэ да оруннаах курдук.
Мин араас омук дьоно кини аатын ааттаабытынан айаннаан кэлэр, омук туристарын үөрэ көрсөр Тымныы полюһун Өймөкөөн олохтооҕо, урбаанньыт Тамара Васильеваны кытта төлөпүөнүнэн анаан кэпсэттим.
— Кытай киһитэ бэлэсипиэтинэн Өймөкөөҥҥө айаннаан иһэрин туһунан сураҕы куораттан эрийэн кэпсээбиттэрэ. Сүүрбэччэ сыл тухары омуктары көрсөбүн да, биирдэ да дьиэм тиэргэнигэр диэри бэлэсипиэтинэн сүүрдэн кэлбит турист суоҕа. Арай аҕыйах хонугунан тиийэн кэлэр ини. Ол эрээри бэлэсиэпитинэн Өймөкөөҥҥө кэлиини биир бэйэм итэҕэйбэппин. Арай кырдьык тиийэн кэллэҕинэ көрсөрүм чахчы.
Бу күннэргэ араас омук дьонунан дьиэм тобус-толору. Ол курдук, бэҕэһээ Финляндия туриһа Магадантан айаннаан иһэн, кэлэн хонон ааста. “Бачча чугаһаан баран, Тымныы полюһун Өймөкөөнү көрдөхпүнэ сатанар”, — диэн анаан кэлэн ааста. Бүгүн киэһэ Германияттан икки турист айаннаан кэллэ. Өйүүн Япония оператора киинэ уста кэлэрин кэтэһэбин. Тохсунньу 4 күнүттэн күн бүгүнүгэр диэри 70-тан тахса омук туриһа кэлэн барда. Ол курдук, Индияттан, Грецияттан, Кувейтан, Польшаттан, Францияттан, Италияттан, Австрияттан, АХШ-тан кэлэн ыалдьыттаатылар. Тохсунньу-олунньу ыйдар – омуктар саамай сылдьар ыйдара. Ол эрээри биир ый иһигэр маннык тоҕо ааҥнаан кэлиилэрэ суоҕа, — диэн кэпсиир Тамара Егоровна.
Өймөкөөн урбаанньыта омук туристарын саататар бырагыраамата киэҥ ис хоһоонноох. Ол курдук, муус аннынан балыктатан, Итегеловтар дьиэ кэргэн сылгы көрөр базаларыгар, саха ынаҕын иитэр Винокуровтар хаһаайыстыбаларыгар сырытыннаран, Тымныы полюһун олохтоохторун күннээҕи дьарыктарын билиһиннэрэр. Орто оскуола үөрэнээччилэрин уус-уран кэнсиэрин көрдөрөн, саха култууратын арыйар, Арчы балаҕаныгар арчылатан, норуоппут абыычайын көрдөрөр. Бу тэрээһиннэри Чысхаан илиититтэн Тымныы Полюһугар сылдьыбыттарын туһунан анал Сертификаты туттаран түмүктүүр. Онон омук туристара үс-түөрт хонугу быһа билбэтэхтэрин билэн, саха аһын үөрэ-көтө амсайан, аны сайын кэлиэх буолан бараллар.
… Кытайтан бэлэсипиэтинэн айаннаан иһэр турист, кырдьык сурах буоллаҕына, суолтан туораан хаалбатаҕына, ханна тиийбитэ сотору кэминэн иһиллэр ини. Онон бу тиэмэни хонтуруолга ыллыбыт. Салгыы истэ-билэ сылдьан, билиһиннэриэхпит.
Елена Потоцкая, «Саха сирэ» хаһыат, edersaas.ru