Саха Өрөспүүбүлүкэтин «Дьулуур» оҕо биир сомоҕо хамсааһына, «Саха КВН Лигата” ыччат общественнай тэрилтэтэ уонна «DetSAT» айар бөлөх киэҥ хамаанда буолан быйыл сайын иккис киинэлэрин устан саҕалаатылар.
Киинэни Хаҥалас улууһун Булгунньахтаах нэһилиэгэр уонна Нам улууһугар аҕыйах хонуктааҕыта устан саҕалаабыттара. Киинэ режисеерунан Олоҥхо тыйаатырын эдэр артыыһа Гаврил Менкяров буолар. Гаврил бу киинэҕэ режиссердааһыҥҥа бастакы уопута буолар. Устуу түгэннэриттэн, устар хампаанньа олоҕуттан түгэннэри артыыстар бары аныгы олох сиэринэн Инстаграмнарыгар хаартыска, видео таһааран, кэпсээн иһэллэр. Сураҕа, саҥа киинэн «Экспедиция» диэн ааттаммыт үһү. Киинэ ис хоһоонуттан быһа тардан кэпсээтэххэ маннык: сайыҥҥы кэмҥэ ХИФУ уонна ДЬТХА устудьуоннара практикаларыгар холбоһуктаах экспедицияҕа бараллар. Кинилэр Саха сиригэр 13-14 үйэҕэ олоро сылдьыбыт түҥ былыргы дьон историяларын, олохторун-дьаһахтарын чинчийэллэр. Манна таптал, доҕор-атас бэйэ-бэйэтигэр сыһыана көстүө. Экспедиция кэмигэр айылҕа кэрэ көстүүтэ, мүччүргэннээх сырыылар, олох уустуктара киинэ ис хоһоонун сытыырҕатан биэриэхтэрэ.Сүрүн оруолларга Гаврил Менкяров бэйэтэ, Прокопий Иванов, Борислав Степанов, Раиса Кириллина оонньуохтара.
Былырыын сайын Саха КВН уонна «DetSAT» айар бөлөх «Уон биэс күн» диэн кэмиэдьийэ жанрдаах киинэни устубуттара. Киинэ аҕыйах кэм иһигэр Саха сирин биир гына тарҕанан, улуустарынан көрдөрүллэн, киэҥ биһирэбили ылбыта. Онон «Экспедиция» киинэттэн элбэҕи күүтэбит.
Киинэ устуутун таһынан көрдөөх көкөттөр өссө оҕолорго анаан икки сезоннаах лааҕыр үлэлэтээри сүүрэ-көтө, күн солото суох сылдьаллар. Онон бу сайыны көрдөөх көкөттөргө былырыыҥҥы курдук эмиэ туһалаахтык айа-тута атааран эрэллэр.
Айтана АММОСОВА