Хаҥалас улууһун II—c Дьөппөн нэһилиэгин орто оскуолата өрөспүүбүлүкэбит биир бастыҥ агрооскуолатынан биллэр. Маннык оскуолаҕа үөрэнэр оҕо 14 сааһыттан бэйэ дьыалатын тэриниэхтэрин, үлэлиэхтэрин-хамсыахтарын сөп. Номнуо бизнестээх үөрэнээччилэр Мусялаах Айаалы билиһиннэрэбит.
«Сибэккинэн» суруйар
Муся Ефимова 11-с кылаас үөрэнээччитэ. Ааспыт сайын нэһилиэгэр ландшафт дизайнынан дьарыктанар. Кини 10-с кылааска үөрэнэрин тухары араас сибэккини, оту-маһы үөрэппит, үүннэрбит уонна ыам ыйыгар Кыайыы скверин уонна оскуола таһын киэргэппит.
— II—c Дьөппөн уулуссаларын урукку өттүгэрсибэкки үүннэрэн киэргэппэт этилэр. Онуоха агроном эдьиийим сүбэтинэн бу дьыаланы ылсарга санаммытым. Кыһын оскуола иһигэр сибэккилэрбин олордотолоон саҕалаабытым. Сааһыары бииргэ үөрэнэр оҕолорум көмөлөрүнэн олордуохтаах сирбит буорун хаспыппыт. Кыайыы скверигар Кыайыы 70 сылынан «70» диэн араас сибэккинэн сурук таһаарбытым. Сибэккилэрим араастаан үүнэллэрин курдук барытын өҥнөрүнэн араартаан олордубутум. Сайыны быһа күн аайы кэлэммин бүөбэйдиирим, уу кутарым. Атырдьах ыйыгар сибэккилэрим чэчирии үүнэн, нэһилиэк дьоно биир саамай сөбүлээн сылдьар сирдэрэр буолбута. Бу үлэлиирбэр барытыгар хамнас аахсан, сайыммын туһалаахтык атаарбытым. Оскуолабын быйыл бүтэрэбин. Ханнык үөрэххэ туттарсарбын быһаарына иликпин. Онтон бу дьыалабын биир эмит оҕо салҕыыр ини диэн эрэнэбин. – диэн кэрэ дьарыктаах Муся кэпсээнин түмүктүүр.
Тимири эрийэр Айаал
Айаал Захаров 10-с кылааска үөрэнэр. Айаал тимири уһаарыынан дьарыктанар. Нэһилиэгин дьонугар тимир күрүөлэри, ааннары, сибэкки иһиттэри уо.д.а. дьиэҕэ-уокка туттуллар араас малы-салы барытын оҥорор эбит. Айаал аҕата уус буолан, кыра эрдэҕиттэн тимири хайдах эрийэри, токурутары, быһары-отору барытын билэ-көрө улааппыт. Айаал уһанар тэрил арааһын туһанар. Бу ньыманы туттан, II—c Дьөппөн сүрүн уулуссатын тула тимирдэринэн олбуор оҥорбут. Онон оҕо-урбаанньыт нэһилиэк тупсаҕай көстүүлээх буоларыгар эмиэ кыттыгастаах. Билиҥҥитэ элбэх сакаас киирэн, аны сайын Айаал үлэлииргэ бэлэм сылдьар. Быйыл сөбүлүүр дьарыгын туһунан бырайыак барылын суруйан, бүтүн Россиятааҕы конференцияҕа ситиһиилээхтик кыттыбытын киэҥ тутта кэпсиир.
Киһи оҕо эрдэҕиттэн төрөөбүт дойдуга бэриниилээх улааттаҕына, кини онтон тэйбэт, ырааппат. Оччоҕо эрэ тыа сирэ сайдар. Онон оскуола оҕолоро нэһилиэк сайдарын туһугар үлэлииллэрэ-хамсыыллара хайҕаллаах.
Айтана АММОСОВА