Дойду киин куоратыгар Москваҕа, Кыһыл болуоссакка бэс ыйын 3-6 күннэригэр, үгэс буолбут, “Кыһыл болуоссат” кинигэ бэстибээлэ буола турар. Онон, кылаабынай болуоссакка быйыл Россия араас регионнарыттан – Саха сириттэн Крымҥа тиийэ уопсайа 400-тэн тахса кинигэ кыһата муһунна.
Бу күннэргэ ыытыллар 500-тэн тахса тэрээһин барыта улуу бэйиэт Александр Пушкин төрөөбүт күнүгэр итиэннэ Нуучча тылын күнүгэр ананар.
Биллэрин курдук, Саха Өрөспүүбүлүкэтин С.А.Новгородов аатынан “Бичик” кинигэтин кыһата дойду издательстволарын бу сүрүн бэстибээллэригэр сыллата ситиһиилээхтик кыттар.
Быйыл даҕаны “бичиктэр” кыайыы үөрүүтүн хайыы-үйэҕэ биллилэр. Ол курдук, бэстибээл иккис күнүгэр “Саха сирин кыыллара” диэн энциклопедиятынан “Бичик” кинигэ кыһата “Увлекательное краеведение” номинацияҕа “Малая Родина” ХIII Бүтүн Россиятааҕы куонкурус дипломунан наҕараадаланна. Кинигэ Россияҕа Экология сылынан бэчээттэнэн тахсыбыт.
Маны таһынан, Бэчээккэ уонна маассабай коммуникацияларга федеральнай агентство, Регионнааҕы уонна кыраайы үөрэтэр литература Бүтүн Россиятааҕы “Малая Родина” куонкуруһа СӨ Судаарыстыбаннай Мунньаҕын (Ил Түмэн) Бэрэссэдээтэлэ Александр Николаевич Жиркову С.О. Шмидт аатынан “Подвижник краеведения” дипломунан наҕараадалаатылар. Биллэрин курдук, бу дьоһун наҕараада дойду кыраайы үөрэтиитин сайыннарыыга уонна төрөөбүт дойду историятыгар биллэр-көстөр кылааты киллэрбит дьоҥҥо туттарыллар.
Татьяна МАРКОВА,«Саха сирэ» хаһыат, edersaas.ru