close
Кыһын сиир эккитин билигин хаһааныҥ
Олох-дьаһах - Тыа сирэ

Кыһын сиир эккитин билигин хаһааныҥ

Тыа хаһаайыстыбатын уонна ас-үөл бэлиитикэтин министиэристибэтигэр «Саха сиригэр оҥоһулунна» бырайыак чэрчитинэн, олохтоох табаары оҥорооччулары өйөөһүн саҥа аахсыйата – форварднай хантараактары түһэрсии тэрилиннэ.

edersaas.ru 


Семен Потапов, тыа хаһаайыстыбатын уонна ас-үөл бэлиитикэтин миниистирин солбуйааччы:

Аһы-үөлү батарыыга «Мин хаһаас этим» аахсыйа чэрчитинэн, эт атыылаһыан баҕарар киһи форварднай хантараак түһэрсэр кыахтанна. Ол эбэтэр, билигин дуогабар түһэрсэн, талбыт этин cыанатын 30-50 %-ын урутатан төлүүр, хаһаайыстыба ону аны күһүн, идэһэ «дьаһайылларын» саҕана, дьиэтигэр илдьэн биэрэр.

Былырыын өрөспүүбүлүкэҕэ тыыннаах ыйааһынынан 1,8 тыһ. туонна эт соҕотуопкаламмыта, быйыл бу сыыппара 3 тыһ. туоннаҕа тиэрдиллиэҕэ. Тиэндэр быһыытынан, эт соҕотуопкатыгар 21 астыыр-таҥастыыр хаһаайыстыба, кэпэрэтиип үлэлиирэ быһаарылынна. Быйылгы сылга өрөспүүбүлүкэ бүддьүөтүгэр эт соҕотуопкатын тэрийиигэ 109 мөл. солк. көрүллүбүтэ. Маны таһынан, соҕотуопкалыыр хаһаайыстыбалар «Туймаада» ҮХАПК-тэн 70 мөл. солк. кирэдьиит ылаллар. Итинэн салаа күөн үптэнэн, тыа хаһаайыстыбатын табаарын оҥорооччулар эти хаһан баҕарар уонна төлөбүрэ хойутуо диэн дьиксиммэккэ туттарар кыахтаннылар.

Форварднай хантараактары түһэрсии аахсыйатын саҕалыыр тэрээһиҥҥэ 16 хаһаайыстыба кыттан, сыаналарын уонна эттэрин ассортименын билиһиннэрдилэр. Кинилэр дуогабары билигин, эт сыаната арыый удамыр эрдэҕинэ түһэрсэргэ этэллэр, кыһын сыана ыарыыр дииллэр.

Айаал Макаров, «Түмэн» ТХПК салайааччыта:

Ырыынакка эт быстыбакка баар буолуута хааччыллыахтаах. Билигин олохтоох эт кэмчи буолан, сүрүннээн, өрөспүүбүлүкэ таһыттан, өссө омук сириттэн аҕалыллар эт атыыланар. Ол иһин, эккэ идэтийэр уонна сүөһү иитэр хаһаайыстыбалары өйүүргэ маннык бырайыактар тирэх буолуохтара.

«Мин хаһаас этим» аахсыйаны саҕалыыр тэрээһиҥҥэ форварднай хантараагы бастакынан үлэ уонна социальнай сайдыы миниистирэ Александр Михеев түһэристэ, «Мүрү-Ас» ТХПК-тан эт атыылаһарга кэпсэттэ. Арктика дьыалаларыгар судаарыстыбаннай кэмитиэт салайааччыта Прокопий Николаев «Таба» хампаанньаттан таба этин ыларга дуогабардаста. Бу киэһэ барыта 450 тыһ. солк. суумалаах уон сэттэ хантараак түһэрсилиннэ.

«Саха сиригэр оҥоһулунна» бырайыак чэрчитинэн, «Мин хаһаас этим» аахсыйа саҕаланна. Онон, өрөспүүбүлүкэ олохтоохторо, соҕотуопкалыыр уонна астыыр-таҥастыыр тэрилтэлэри кытары форварднай хантараагы түһэрсэн, кыһын сиир эккитин билигин хааччыныҥ!

Дьокуускайга: «Таба» хампаанньа, «Сахаагропродукт», «Түмэн», «Үрдэл», «Дабаан» кэпэрэтииптэр, улуустарга: «Амма», «Чурапчы», «Бөртө-Ас» (Хаҥалас), «Мүрү-Ас» (Уус Алдан), «Сыа Бүлүү» (Бүлүү), «Бай-тай» (Үөһээ Бүлүү), «Батамаайы» (Ленскэй), «Полюс холода» (Дьааҥы), «Амтан» (Орто Халыма), «ГорныйМясоПродукт» (Горнай), «Таатта» уонна «Баай-Ас» (иккиэн таатталар), «Хоту» уонна «ММК» ХЭУо (мэҥэ хаҥаластар), «Янда» итиэннэ «Эрэл» (намнар) кэпэрэтииптэр хантараак түһэрсэргэ бэлэмнэр.

Раиса СИБИРЯКОВА, «Саха сирэ» хаһыат, edersaas.ru 

 

4
0

Сайт матырыйаалларын ааптар көҥүлэ суох ылар бобуллар.
Facebook
Facebook
Instagram
GOOGLE
http://edersaas.ru/ky-yn-siir-ekkitin-biligin-ha-aany/

Санааҕын хааллар

INSTAGRAM ЛЕНТАТА

Instagram батыһан бар