Олунньу 19 күнүгэр Уус Алдан улууһун Суотту нэһилиэгэр сэттэ түөлбэ кыттыылаах кимиилээх киирсилэр буолан аастылар. Ол эбэтэр, уһун кэмнээх тохтобул кэнниттэн нэһилиэккэ волейболга, остуол тенниһигэр, саахымакка, дуобакка, сыал ытыытыгар, гиирэ анньыытыгар тыҥааһыннаах күрэхтэһии ыытылынна.
Надежда ЕГОРОВА, «Саха сирэ» хаһыат, edersaas.ru
Сааһынан хааччаҕа суох, эдэр-эмэн дьон түмсэн, кыайыы иһин 12 чааска диэри күрэхтэстилэр. Өрөспүүбүлүкэҕэ биллибит бэтэрээн-спортсменнар билигин да «буорахтаахтарын» биир дойдулаахтара сэҥээрэ уонна сөҕө көрдүлэр. Оттон кырдьаҕастар кинилэр ыччаттара чөл олоҕу батыһан, спорду өрө туталларыттан астыннылар, аҕам дьон холобурун салгыы батыһалларыгар баҕа санааларын эттилэр.
Бу күрэхтэһиилэр түмүктэринэн бастакы миэстэни – «Дьулуур», иккиһи – «Үрдэл», үсүһү «Төрүт» түөлбэлэр ыллылар.
Тэрээһини иилээн-саҕалаан тэрийбит спорт инструктора Екатерина Максимова:
– Суотту тыа сирин улахан нэһилиэктэригэр киирсэр, уопсайа 2600 киһи олорор, сэттэ түөлбэҕэ арахсар. Түөлбэлэр күрэхтэһиигэ эрдэттэн бэлэмнэммиттэрэ тута харахха быраҕылынна. Бары көрүҥнэргэ бэйэлэрин дьоннорун сөпкө аттаран туруорбуттар. Хас биирдии түөлбэ бэйэ-бэйэлэригэр маарыннаспат таҥастаммыта, уопсайа 250 киһи кыттыбыта күрэхтэһиини өссө киэргэттэ.
Кыайбыт спортсменнар улууска нэһилиэктэрин чиэһин көмүскүү барыахтаахтар. Оттон чулууттан чулуулара өрөспүүбүлүкэҕэ сүүмэрдэниэхтэрэ. Онон, кыымтан саҕыллыбыт күрэхтэһии киэҥ далааһыны эрэйэр.
Инникитин өссө сэргэх буоларын туһугар өбүгэ оонньууларын сөргүтэр баҕалаахпыт. Үрүҥ тунах ыһыахпытын көрсө үс кыайыылаах түөлбэбитигэр оҕо былаһааккатын бириис быһыытынан туттарыахпыт, – диэн үөрүүтүн үллэһиннэ.
Надежда ЕГОРОВА, «Саха сирэ» хаһыат, edersaas.ru