Сунтаардар Кыайыы күнүн бырааһынньыгын уратытык тэрийэр үгэстээхтэр. Кыайыы 72 сылын көрсө Аҕа дойду Улуу сэриитин кыттыылаахтарыгар, тыыл бэтэрээннэригэр, олохтоохторго киинэ-кэнсиэр бэлэхтиэхтэрэ.
Анивера Акимова, «Саха сирэ» хаһыат,https://edersaas.ru
Сунтаардар бу инниннээҕи сылларга Сунтаар 1-кы нүөмэрдээх оскуолатын учуутала Надежда Тихонова суруйуутунан «Тыыннаахтар умнубат сыллара», «Таптал…Сэрии… Эрэл» диэн ааттаах музыкальнай испэктээкиллэри туруорбуттара. Сылын ахсын ыытыллар испэктээкиллэргэ 600 – 700 киһи кыттара. Онтон былырыын Борис Васильев сэһэнинэн «А зори здесь тихие» киинэни киин болуоссакка олохтоохторго көрдөрбүттэрэ.
Быйыл ыам ыйын 9 күнүгэр Сунтаар бастакы нүөмэрдээх уонна музыкальнай оскуолалар күүстэринэн олохтоохторго эмиэ киинэ-кэнсиэрт бэлэхтиэхтэрэ. Сунтаардааҕы култуура управлениетын салайааччыта Мария Кобельянованы кытары сибээскэ тахса сылдьыбыппытыгар:
— Сунтаардааҕы 1-гы №-дээх оскуола уонна Оҕо искусствотын оскуолатын көҕүлээһининэн ахсыс төгүлүн Кыайыы күнүн Сунтаардар мюзиклынан уонна киинэ-кэнсиэрдинэн өрөгөйдүүбүт! Бырайыак ааптардара Надежда ТИХОНОВА уонна Алексей СТЕПАНОВ алта сылын араас мюзиклы туруоран, аны иккис сылын киинэ уһулан киинэ-кэнсиэр туруораллар.
Былырыын «Чуумпуга иһийбит аймалҕан» киинэ кэнниттэн, бу сырыыга 1944 сыллаахха Сэбиэскэй саллааттар доруобуйаларынан мөлтөх оҕолор дьиэлэрин быыһабыт дьиҥ олоххо буолбут түбэлтэни киинэ устан холоннулар.
Бу «Единичка» диэн киинэ 2015 сыллаахха сериал быһыытынан Россия ханаалыгар көстүбүтүн бары да өйдүүллэрэ буолуо. Киинэҕэ уопсайа 61 киһи уһулунна. Оттон киинэ-кэнсиэркэ 210 киһи кыттыыны ылыаҕа. Туруорааччы: А.Степанов, сценарий ааптара: Н.Тихонова, оператор: Я.Филиппов, монтаж, компьютернай графика: А.Горохов, С.Спиридонов, Н.Данилов, звукорежиссер: А.Горохов. Бу улахан айымньыга Сиэн Тиитэп Виктор Хон тылларыгар «Сэрии сылларын оҕолоругар» диэн ырыа кытта айбыта.
Быйыл Сунтаардар ыам ыйын 9 күнүн «Кутурҕан томторугар» чугаһаан, «Алмаз» стадиоҥҥа көрсөбүт. «Единичка» киинэ стадиоҥҥа бар дьоҥҥо киэһэ 23.00 чааска сүрэхтэниэ. Сунтаарбыт Кыайыыны өрөгөйдүүр айар бөлөхпүт айымньытын уруйдуу-айхаллыы көрүөҕүҥ, бу күн бары бииргэ кыайыыны өрөгөйдүөҕүҥ!», — диэн кэпсээтэ.
Анонсун видеоҕа көрүҥ. Сунтаардар бу курдук саҥаттан саҥа, ураты тыыннаах тэрээһиннэринэн – Кыайыыны уруйдууллар.
Анивера Акимова, «Саха сирэ» хаһыат,https://edersaas.ru/