Өрөспүүбүлүкэбит бары нэһилиэктэригэр Аҕа дойду Улуу сэриитин сыллара үйэлэр тухары оспот бааhы хаалларбыттара. Сэрии толоонугар үгүс биир дойдулаахтарбыт дьоруойдуу охтубуттара.
Анивера АКИМОВА, «Саха сирэ» хаһыат, edersaas.ru
Уус Алдан улууһун Тулуна нэһилиэгин олохтоохторо Кыайыы күнүгэр үгэскэ кубулуйбут сэлэлии хаамыыга тэрилтэлэринэн таҕыстылар.
Аҕа дойду сэриитигэр ѳлбүт буойуннарга аналлаах ѳйдѳбүнньүккэ Улуу Кыайыы 72 сылын бэлиэтиир үѳрүүлээх чааhа ыытылынна. Сэрии толоонугар охтубут саллааттарга Аҕа дойду улуу сэриитин кыттыылааҕа Василий Васильев, нэһилиэк баһылыга Иннокентий Троев, бэтэрээннэр түмсүүлэриттэн Мария Дегтярева уонна ыччаттар венок уурдулар.
Бу күн түөлбэлэринэн эстафета ыытыллан, бастакы миэстэҕэ «Сэмэн Баһылайап», иккискэ «Кэскил», үһүскэ «Дьулуур» хамаандалар таҕыстылар.
Оттон Сунтаарга улуустааҕы култуура салаатын салайааччы Мария Кобельянова «Эдэр саас» сайтка:
— Сунтаар улууһа Кыайыы күнүн биэс сэрии бэтэрээннээх көрсөр! Улуустан
2757 киһи сэриигэ барбыта, онтон 1651 киһи сэрии толоонугар охтубута, 1106 киһи Кыайыы өрөгөйдөөх дойдуларыгар эргиллэн кэлбиттэрэ.
Кыайыы бырааһынньыгын тэрээһинэ быйыл «Кутурҕан томторугар» чугаһаан «Алмаз» баараҕай стадионугар бар дьону түмтэ. Сэлэлии хаамыыга сэрии оҕолоро, «Өлбөт үйэлээх полк» уонна тэрилтэлэр хаамтылар. Бүгүҥҥү үөрүүлээх тэрээһиҥҥэ сэрии бэтэрээнэ, Сунтаар нэһилиэгин бочуоттаах олохтооҕо Дмитрий Григорьев биһигини кытта бииргэ көрсөрө улахан дьол.
Мантан киэһэ «Сунтаар сонуннара» хаһыат үгэскэ кубулуппут сүүрүүгэ күрэхтэһиитэ, Кыайыы оһуохайа, вальса уонна «Единичка» киинэ-кэнсиэр, салют тэриллиэҕэ. Кыайыы күнүнэн!», — диэтэ эҕэрдэтин тиэртэ.
Кэбээйи улууһун Сангаар бөһүөлэгэр олохтоохтор Кыайыы күнүн өрө көтөҕүллүүлээхтик бэлиэтээтилэр. Кыайыы вальса сонун тэрээһиҥҥэ 60 паара кытынна.
Анивера АКИМОВА, «Саха сирэ» хаһыат, edersaas.ru