Бүгүҥҥүттэн Париж куоракка ыытыллар аан дойду чөмпүйэнээтигэр дьахталлар тустуулара саҕаланар.
Дьахталлар сүүмэрдэммит хамаандаларын кылаабынай тириэньэрэ Юрий Шахмурадов Парижка сүрүннээн дойду быйылгы чөмпүйүөннэрэ тустуохтарын эттэ. Арассыыйа сэттэ быйылгы чөмпүйүөнүн сэргэ дойду 2017 сыллааҕы чөмпүйэнээтин боруонса призера Анастасия Братчикова (69 кг диэри) тустуоҕа. Онон хамаанда састааба маннык буолла: 48 кг — Дарья Лексина, 53 кг — Стальвира Оршуш, 55 кг — Мария Гурова, 58 кг — Валерия Коблова, 60 кг — Любовь Овчарова, 63 кг — Валерия Лазинская, 69 кг — Анастасия Братчикова, 75 кг — Алена Перепелкина.
Хамаанда куратора Омар Муртузалиев кыргыттары кыайыыга көҕүлээн, бастаабыттарга эбии 50 тыһыынча доллары эрэннэрдэ. Иккис, үһүс буолбуттар туһааннааҕынан 30 уонна 20 тыһыынча доллары ылыахтара диэтэ.
Роман Попов, “Саха сирэ” хаһыат