Кэлиҥҥи сылларга СӨ бырабыыталыстыбата чэпчэки сыаналаах куортамнанар дьиэ-уот ырыынагын олохтооһуҥҥа үлэлээн эрэр. Ол курдук, 2016 сыллаахха СӨ Ил Дархана Егор Борисов «Формирование рынка арендного жилья и наемных домов» диэн хос бырагырааманы бигэргэппитэ.
Бырагыырамаҕа олоҕуран, куортамҥа бэриллэр дьиэлэр тутуллуохтаахтар уонна арендаҕа ылыллыахтаахтар. 2015 – 2016 сыллаахха судаарыстыбаннай бүддьүөттэн бу сыалга анаан 191 мөл. солк. үбүлээһин көрүллүбүтэ. Быйыл 2700 кв миэтэрэ иэннээх 65 кыбартыыра тутуллара былааннанар. Тутуу министиэристибэтин исписэлиистэрэ иһитиннэрбиттэринэн, ыам ыйыгар 28 кыбартыыраны бытовой тиэхиньикэнэн, миэбэлинэн хааччыйбыттар. Ол курдук, Дьокуускай куорат Каландаришвили уулуссатын 25 А №-дээх дьиэтигэр баар кыбартыыралар куортамҥа бэриллиэхтээхтэр. Ол иһигэр:
- Биир хостоох 10 кыбартыыра – 35,28 – 35,3 кв миэтэрэ иэннээхтэр;
- Икки хостоох 17 кыбартыыра – 57,7 – 58,56 кв миэтэрэ иэннээхтэр;
- Үс хостоох 1 кыбартыыра – 77,58 кв миэтэрэ иэннээх.
Маны таһынан, Дьокуускайга Богдан Чижик аатынан уулуссаҕа 124 кыбартыыралаах дьиэ «Куортамнанар дьиэ» бырагыраамаҕа олоҕуран, 37 кыбартыыра куортамҥа бэриллиэхтээх. Удамыр сыаналаах кыбартыыраны куортамҥа биэрии механизмын бырайыагын оҥорон бэлэмнээтилэр. Ол курдук, бырагыраамаҕа кыттыан баҕалаахтар бас билэр дьиэтэ суох буолуохтаахтарын таһынан, 2002 сылтан саҕалаан федеральнай уонна өрөспүүбүлүкэтээҕи бүддьүөт көмөтүнэн олорор дьиэлэрин усулуобуйатын тупсарбатах буолуохтаахтар.
Анивера АКИМОВА, «Саха сирэ» хаһыат, edersaas.ru