Балаҕан ыйын 7 күнүгэр киинэ норуоттар икки ардыларынааҕы бэстибээлин чэрчитинэн Саха тыйаатырыгар «Кыйаар мохсоҕоллоро» киинэ көһүннэ. edersaas.ru
«Кыйаар мохсоҕоллоро» киинэ аан бастаан Үөһээ Бүлүүгэ Манчаары Оонньууларын кэмигэр сүрэхтэммитэ.
Документальнай, уус-уран киинэ режиссера – Үөһээ Бүлүүттэн төрүттээх Радмила Кононова, продюсер – СӨ норуодунай артыыската Зоя Багынанова. Киинэ сценарийын СӨ үтүөлээх артыыската, Саха тыйаатырын артыыската Зоя Попова, «Саха» араадьыйа үлэһитэ Майя Власьева Үөһээ Бүлүүттэн төрүттээх суруйааччы, араадьыйа-суруналыыс Степан Дадаскинов үс кинигэтигэр олоҕуран оҥордулар.
Зоя Багынанова киинэ көрдөрүллүөн иннинэ бар дьонугар иһитиннэрбитинэн, кыйаар (кый ыраах) диэн былыр Бүлүүнү ааттыыллар эбит.
— Мин дойдубар Далырга Алексей Петрович Васильев-Мордьонноохоп, Мэйиккэ Василий Иннокентьевич Степанов-Буучугурас, Балаҕаннаахха Никита Константинович Докторов-Бычырдаан диэн күүстээх, сымса, хапсаҕайдьыт дьон үөскээн ааспыттара. Бу дьон туһунан үс сылы быһа устубут киинэбитин улууһум, дьонум-сэргэм уонна Сахам тыйаатыра өйөөтүлэр, – диэн сыралаах үлэлэрэ бэстибээл бырагырааматыгар киллэриллэн көрдөрүллэриттэн үөрэрин туһунан эттэ.
Киинэни көрө киинэ үс дьоруойун оҕолоро, сиэннэрэ, киинэҕэ уһуллубут дьон кэллилэр.
Улуус баһылыгын социальнай боппуруостарга солбуйааччы Люция Тойтонова Зоя Багынанованы уонна бииргэ үлэлээбит хамаанданы ис сүрэҕиттэн эҕэрдэлээтэ.
— Бу киинэ Үөһээ Бүлүүгэ көрдөрүллүбүтүн кэнниттэн бибилэтиэкэҕэ санаа атастаһан, «төгүрүк остуолу» ыыппыппыт. Айар куттаах дьон үксүгэр оҥорбуттарынан астыммат идэлээхтэр. Зоя Петровна эмиэ бу киинэтигэр өссө да эбэр-сабар, ситэрэр былааннардаах. Онон, киинэҕэ салгыы үлэлээһин барыаҕа. «Кыйаар мохсоҕоллоро» үс буойун бөҕөс олохторун көрдөрөр эрэ буолбакка, ыччаты иитэр-үөрэтэр дириҥ суолталааҕын сыаналыыбын. Онон, өрөспүүбүлүкэбит ыччаттарыгар туһалаах буоллун диэн компакт-диискэ таһаарарга үлэлэһэр санаалаахпыт, – диэн эҕэрдэтин тириэртэ.
Манна даҕатан эттэххэ, быйыл Үөһээ Бүлүүгэ спорт оонньууларыгар тутуллубут саҥа стадион бу үс бөҕөс аатын үйэтитэн, «Үс хоһуун» диэн ааттаммыта уонна боруонса пааматынньык туруоруллубута.
Икки чаастан турар киинэ документальнай уонна уус уран хабааннаах. Киинэҕэ үс буойун-бөҕөс төрөөбүт алаастарыттан саҕалаан олохторо-дьаһахтара көрдөрүллэр. Дьоруойдар оҕо уонна эдэр-эмэн саастарын Саха тыйаатырын уонна улуустааҕы тыйаатыр артыыстара оонньууллар.
Элбэх киһи ахтыылары оҥорбута киинэ ис хоһоонун олус байытар. Онтон Никита Константинович Докторов-Бычырдаан бэйэтэ видеоҕа уһуллан хаалбыт сюжеттара биһиги кэммитигэр тиийэн кэлбиттэрэ кэрэхсэбиллээх. Мордьонноохоп, Буучугурас, Бычырдаан тустарынан билбэт да киһи бу киинэни көрөн баран, кинилэр тустарынан өссө билиэн-көрүөн баҕарар, саха дьоно маннык күүстээх дьоннооҕунан киэн туттар.
Надежда ЕГОРОВА, «Саха сирэ» хаһыат, edersaas.ru