Пушкин аатынан библиотека историческай саалатыгар бастакы ыҥырыылаах Ил Түмэн бэрэстэбиитэллэрин Палаататын Бэрэссэдээтэлэ, өрөспүүбүлүкэ үтүөлээх юриһа Афанасий Петрович Илларионов туһунан «Күн сирин үтүө киһи киэргэтэр» кинигэ сүрэхтэниитэ буолан ааста.
Баай ис хоһоонноох кинигэни В.Е.Илларионова уонна К.М.Тарабукина хомуйан, 1000 экземплярынан “Якутия» медиа-холдиҥҥа бэчээттэппиттэр. Дьоро киэһэҕэ Ил Түмэн Бэрэссэдээтэлэ А.Н.Жирков, Конституционнай суут Бэрэсээдээтэлэ А.Н. Ким-Кимэн, иккис ыҥырыылаах Ил Түмэ бэрэстэбиитэллэрин Палаататын Бэрэссэдээтэлэ Е.М.Ларионов, Чурапчы улууһун баһылыга А.Т.Ноговицын, Хайахсыт нэһилиэгин баһылыга В.В.Прудецкай, аймахтара, доҕотторо, бииргэ үлэлээбит кэллиэгэлэрэ Афанасий Петрович туһунан иһирэх ахтыы оҥордулар. Киэҥ сааланы толору мустубут дьон Афанасий Илларионов бөдөҥ салайааччы, соруктаах сокуонньут, иһирэх иэйиилээх хоһоонньут, ураты ньымалаах тылбаасчыт буоларын өссө төгүл итэҕэйдилэр. Кини аймах-билэ дьонун уонна үөлээннээхтэрин ахтыылара, урукку өттүгэр бэчээккэ тахса илик оскуолатааҕы холонуулара, табаарыстарыгар, аймахтарыгар анаабыт эҕэрдэлэрэ, хоһоонноро, библиографическай ыйынньыктар кинигэ ис хоһоонун байыттылар, ураты уйаҕас-сайаҕас тыыннаатылар, саҥа санааалары сахтылар.
Афанасий Илларионов хоһооннорунан саха норуодунай артыыһа Зоя Багынанова оҥорбут дьүһүйүүтэ, суруналыыс Яна Угарова умсулҕаннаах сонета, эстрада сулуһа, үтүөлээх артыыс Анастасия Готовцева «Чараҥ вальса» ырыата үгүс киһи кутун-сүрүн тутта.
Лилия Попова, А.П.Илларионов аатынан Хайахсыт орто оскуолатын учуутала, «Саха сирэ» хаһыат, edersaas.ru сайтыгар анаан.