«Үс Хоһуун» стадиоҥҥа уолаттар, кыргыттар, эр дьон уонна бэтэрээннэр кылыыга күрэхтэһиилэрэ күнүс саҕаланан баран киэһээ түмүктэннэ. Атах оонньуутун сэргээччилэр ордук эр дьон куоталаһыыларын тэһийбэккэ-тулуйбакка күүппүттэрэ.
Бастыҥнары быһаарар барыллаан ыстаныылар түмүктэринэн, мэтээл иһин киирсэр быраабы аҕыс эр бэрдэ ылла: Дмитрий Вершинин (Таатта, көрдөрүүтэ 43 м 94 см), Яков Дмитриев (Кэбээйи, 44 м 46 см), Виталий Васильев (Ньурба, 44 м 64 см), Владислав Алексеев (Үөһээ Бүлүү, 44 м 85 см), Валентин Иванов (Ленскэй, 44 м 85 см), Иван Пестряков (Уус Алдан, 45 м 60 см), Егор Филиппов (Хаҥалас, 45 м 91 см), Кай Адамов (Чурапчы, 46 м 14 см).
Манна үгүстэр быйылгы «Дыгын оонньууларын» кыайыылааҕа, кылыыга уонна уһуну ыстаныыга өрөспүүбүлүкэ рекордсмена Егор Филиппов кыайыа диэн тойоннообуттара. Ол эрээри, түмүк ыстаныыларга Уус Алдан кынаттаах кылыыһыта Иван Пестряков бастакы холонуутугар 46 м 16 см түһэн бастыҥ көрдөрүүлэнэн, бастаан испит Кай Адамовтан икки сантиметрынан чорбойо түһэр. Салгыы ыстаныыларга Адамовтаах Филиппов 45 миэтэрэлээх кирбиини кыайан куоһарбатылар.
Онон кылыыга «Манчаары оонньууларын» кыайыылааҕынан спорт маастара Иван Пестряков буолла. Кай Адамов, Егор Филиппов туһааннааҕынан иккис, үһүс миэстэлэринэн дуоһуйарга күһэлиннилэр.
Кыргыттарга Арассыыйаҕа бастыыр иһин күрэхтэһии түөрт төгүллээх чөмпүйүөнэ Диана Адаськоны кытта тэҥҥэ туруулаһыах кылыыһыт бу да сырыыга көстүбэтэ. Дьокуускай спортсмена иккис холонуутугар 24, 17 м түһэн баран, салгыы ыстана барбата. Светлана Макарова (Бүлүү, 23,38 м), Айыына Салышева (Уус Алдан, 22, 56 м) иккис, үһүс буоллулар.
Дьахталларга Дьокуускайтан Любовь Унарова бастакы холонуутугар 23, 91 м түһэн, куоталаһааччыларын чаҕытта бадахтаах: иккис көрдөрүүлэммит Юлия Кобякова (Кэбээйи) киниттэн миэтэрэ курдугунан хаалла. Елена Егорова (Ньурба) 22, 89 м кылыйан үһүс бириистээх миэстэҕэ таҕыста.
Бэтэрээннэргэ Андрей Кривошапкин (Кэбээйи) биир эрэ холонуута табылынна, онно кини 27, 68 м түстэ. Кэлин биллибитинэн, ити көрдөрүүтэ кинини пьедестал үрдүгү үктэлин дабайарыгар кыаҕы биэрдэ. Иккис буолбут Үөһээ Бүлүүттэн спорт маастара Дмитрий Наумов 26, 22 м, итиэннэ Ньурба кылыыһыта Захар Ефремов 22, 12 м көрдөрүүлэнэн иккис, үһүс миэстэлэри ыллылар.
Бүгүн спортсменнар ыстаҥаҕа күүстэрин холоһуохтара.
Роман ПОПОВ, «Саха сирэ» хаһыат, edersaas.ru
Ааптар хаартыскаҕа түһэриилэрэ.