Бүгүн СӨ үөрэҕин уонна наукатын миниистирин бастакы солбуйааччы Михаил Присяжнай суруналыыстары кытта көрүстэ. Тиэмэтэ – “Цифровой кырааматынас”.
“Эдэр профессионаллар (Ворлдскиллс Россия)” сойуус эрэгийиэннээҕи “Интэриниэт-технология киинэ” уопсастыбаннай тэрилтэ, бу сыл алтынньы 17-24 күннэригэр 14-18 саастаах оскуола үөрэнээччилэригэр уонна орто анал үөрэх кыһаларын устудьуоннарыгар анаан “Цифровой кырааматынас” диэн онлайн-тестированиены тэрийэр.
“Дойду инники туруорар соруктарыттан биирдэстэринэн цифровизация буолар. Бу ханнык баҕарар эйгэни хабар. “Үөрэх” национальнай бырайыак иһинэн букатын туспа “Цифровой үөрэхтээһин” диэн федеральнай бырайыак баар. Өрөспүүбүлүкэ цифровой эйгэҕэ толору көстө диир кыаллыбат. Саха сирин 370 тыһ. олохтооҕо сыллата цифровой кырааматынаһын үрдэтэр куурустары ааһыахтаах диэн эрэгийиэннээҕи сыанабыл көрдөрбүтэ. Биллэн турар, таһымнара араас. Биһиги кинилэргэ кыах биэриэхтээхпит”, — диэн Михаил Присяжнай быһаарда.
Тестированиены dl.worldskills.ru толоруохха сөп, манна баара-суоҕа 35 мүн. эрэйиллэр. Ол түмүгүнэн, үрдүк көрдөрүүлээх оҕолор ахсынньыга Казаҥҥа ыытыллыахтаах DigitalSkills чөмпүйэнээт сүүмэрдиир бастакы түһүмэҕэр кыттар кыахтаныахтара. Онон бу эйгэҕэ эрдэттэн бэлэмнээх оҕолор, устудьуоннар, бэйэлэрин билиилэрин таһымын, сатабылларын көрдөрөллөрүгэр улахан кыах бэриллэр диэн тэрийээччилэр ыйаллар.
Михаил Присяжнай быһаарбытынан, тустаах тестированиены бэйэтин бэрэбиэркэлэнэ таарыйа улахан дьон даҕаны ааһыан сөп эбит.
Тестирование түмүгүнэн цифровизацияны төһө туһаналларын, бу салааҕа сатабылларын итиэннэ куттала суох туһанар кыахтаахтарын дуу, суоҕун дуу быһаарыныахтара. Ол түмүгүнэн хас биирдии киһиэхэ цифровой кырааматынас пааспара иҥэриллиэҕэ. Онон dl.worldskills.ru регистрацияланыҥ уонна холонон көрүҥ.
Людмила ПОПОВА, “Саха сирэ” хаһыат, edersaas.ru