Сыл саҥатыттан өрөспүүбүлүкэ суол-тырааныспар быһылааныгар 60 оҕо эт-хаан эчэйиитин ылбыт уонна биир оҕо суорума суолламмыт. Ааспыт сылы кытта тэҥнээтэххэ, оҕо кыттыылаах СТБ 75,8 %-нан үрдээбит, оҕо эчэйиитэ икки төгүл элбээбит.
Александр ТАРАСОВ, «Саха сирэ» хаһыат, https://edersaas.ru
Суол быһылаана тахсар кэмигэр оҕолор үксүлэрэ анал куру бааммакка, анал кириэһилэҕэ олорбокко испиттэр эбит. Ол аата манна төрөппүттэр уонна суоппардар буруйдаахтар.
Ол иһин, СӨ ИДьМ-тын Суолга куттал суох буолуутун судаарыстыбаннай иниспиэксийэтин управлениета быйыл ыам ыйын 19 күнүттэн үөрэх дьыла түмүктэниэр диэри оҕолору массыынаҕа тиэйии быраабылатын улахан дьон төһө тутуһалларын күүскэ бэрэбиэркэлиэхтэрэ. ГАИ иниспиэктэрдэрэ оскуола, оҕо саадын уонна дьон элбэхтик тоҕуоруһар сирдэрин аттыларыгар массыыналаахтары тохтотуохтара. Санатар буоллахха, оҕону тиэйии быраабылатын кэспиттэр 3000 солк. ыстарааптаналлар.
